Le Roman de la Rose

Chapitre I

____________________________________________________________________________

Ci est le Rommant de la Rose,

Où l'art d'Amors est tote enclose.

Maintes genz dient que en songes

N'a se fables non e mençonges;

Mais l'en puet teus songes songier

4

Qui ne sont mie mençongier,

Ainz sont après bien aparani;

Si en puis bien traire a garant

Un auctor qui ot non Macrobes,

8

Qui ne tint pas songes a lobes,

Ançois escrist l'avision

Qui avint au roi Scipion.

Quiconques cuide ne qui die

12

Que soit folor e musardie

De croire que songes aveigne,

Qui ce voudra, por fol m'en teigne;

Car endroit moi ai je fiance

16

Que songes est senefiance

Des biens as genz e des enuiz;

Car li plusor songent de nuiz

Maintes choses covertement

20

Que l'en voit puis apertement.

Ou vintieme an de mon aage,

Ou point qu'Amors prent le paage

Des juenes genz, couchiez m'estoie

24

Une nuit, si con je soloie,

E me dormoie mout forment;

Si vi un songe en mon dormant

Qui mout fu biaus e mout me plot;

28

Mais en cel songe onques rien n'ot

Qui trestot avenu ne soit

Si con li songes recensoit.

Or vueil cel songe rimeier,

32

Por voz cuers plus faire esgaier,

Qu'Amors le me prie e comande.

E se nus ne nule demande

Coment je vueil que ïi romanz

36

Soit apelez que je comenz,

Ce est li Romanz de la Rose,

Ou l'Art d'Amors est toute enclose.

La matire en est bone e nueve;

40

Or doint Deus qu'en gré le reçueve

Cele por cui je l'ai empris;

C'est cele qui tant a de pris

E tant est dine d'astre amee

44

Qu'el doit estre Rose clamee.

Avis m'iere qu'il estoit mais,

Il a ja bien cinc anz ou mais.

Qu'en mai estoie, ce sonjoie,

48

Ou tens amoreus, plein de joie,

Ou tens ou toute rien s'esgaie.

Que l'en ne voit boisson ne haie

Qui en mai parer ne se vueille

52

E covrir de novele fueille.

Li bois recuevrent lor verdure,

Qui sont sec tant come ivers dure;

La terre meïsmes s'orgueille

56

Por la rosee qui la mueille,

E oblie la povreté

Ou ele a tot l'iver esté;

Lors devient la terre si gobe

60

Qu'el viaut avoir novele robe;

Si set si cointe robe faire

Que de colors i a cent paire.

L'erbe e les flors blanches e perses,

64

E de maintes colors diverses,

C'est la robe que je devise,

Por quoi la terre miauz se prise.

Li oisel, qui se sont teü

68

Tant come il ont le froit eü

E le tens divers e frarin,

Sont en mai, por le tens serin,

Si lié qu'il montrent en chantant

72

Qu'en lor cuers a de joie tant

Qu'il lor estuet chanter par force.

Li rossigniaus lores s'esforce

De chanter e de faire noise;

76

Lors se deduit e lors s'envoise

Li papegauz e la calandre;

Lors estuet juenes genz entendre

A estre gais e amoreus,

80

Por le tens bel e doucereus;

Mout a dur cuer qui en mai n'aime,

Quant il ot chanter sor la raime

As oisiaus les douz chanz piteus.

84

En icelui tens deliteus,

Que toute rien d'amer s'esfroie,

Sonjai une nuit que j'estoie;

Lors m'iere avis en mon dormant

88

Qu'il estoit matins durement:

De mon lit tantost me levai,

Chauçai moi e mes mains lavai.

Lors trais une aguilie d'argent

92

D'un aguillier mignot e gent,

Si pris l'aguille a enfiler.

Hors de vile oi talent d'aler,

Por oïr des oisiaus les sons,

96

Qui chantoient par ces boissons

En icele saison novele.

Cousant mes manches a videle,

M'en vois lors toz seus esbatant,

100

E les oiselez escoutant,

Qui de chanter mout s'angoissoient,

Por les vergiers qui florissoient.

Jolis, gais e pleins de leece,

104

Vers une riviere m'adrece

Que j'oï près d'ilueques bruire;

Car ne me soi aler deduire

Plus bel que sus cele riviere,

108

D'un tertre qui près d'iluec iere

Descendoit l'eve grant e roide.

Clere estoit l'eve e ausi froide

Come puiz ou come fontaine;

112

Si estoit poi mendre de Seine,

Mais qu'ele estoit plus espandue.

Onques mais n'avoie veüe

Cele eve qui si bien seoit;

116

Si m'abelissoit e seoit

A regarder le leu plaisant.

De l'eve clere e reluisant

Mon vis rafreschi e lavai;

120

Si vi tot covert e pavé

Le fonz de l'eve de gravele.

La praerie grant e bele

Trés au pié de l'eve batoit.

124

Clere e serie e bele estoit

La matinee e atempree;

Lors m'en alai par mi la pree,

Contreval l'eve esbaneiant,

128

Tot le rivage costeiant.