Cinq pastourelles

Pastourelle V

____________________________________________________________________________

Contre le dous tans novel,

k'erbe point novele,

ke li jor sont cler et bel

et la saisons bele,

5

jouste le mont de Cassel

trovai pastorele,

et ot de foille chapel,

em pure gonele,

et chainture d'un rosel:

10

lors si chalemele:

«dorenlot ae!»

Perrins li fiex dant Horde

d'autre part frestele.

Je descendi el prael,

15

dis li «damoisele,

ames moi, maint bel joiel

et meillor cotele

vos donrai d'un pastorel.»

lors dit Perronele

20

«j'ai oi maint Flamenghel

ki trop ont favele

et sont de vanter isnel

dusk'a grant querele.

dorenlot ae!

25

ne set mie mon pense

ki d'amor m'apele.»

La pastore ot cler le vis

et coulor rosee.

dis li «bele, vostre amis

30

sui s'il vos agree.»

«sire, j'ai mon cuer pramis

et m'amor donee

a Perrin qui je mout pris,

doi estre espousee,

35

mais nos somes entrepris

en ceste contree.

dorenlot ae!

li Francois i ont este

ki trop l'ont gastee.

40

Sire, estes vos des eschis

ki l'iaue ont passee,

qui de l'autre part le lis

font lor assamblee?

trecheor et foimentis

45

et gent parjuree!

dorenlot ae!

tot seront deshirete

a honte provee.»