Cinq pastourelles

Pastourelle I

____________________________________________________________________________

Entre le bos et le plaine

trovai de vile lontaine

tose de grant beaute plaine,

ses bestes gardant.

5

cler chantoit come seraine;

et Robins a vois autaine

li respont en flahutant.

et je por oir lor samblant

descendi,     si entendi

10

ke cele li dist tant

«Robin, bien fust avenant

k'eussiens chapel d'un grant

de la flor premeraine.»

A cest mot Robins l'achaine

15

ki por s'amor ert em paine.

«Mariot», fait il, «amaine

tes bestes avant,

ke ne passent en l'avaine;

met les en l'erbe foraine;

20

ton chapel ferai avant:

mais mout me feroies dolant

se le cri     de ton ami

avoie por noiant;

car Perrins se va vantant

25

de cou dont me vois penant

k'il en keudra la graine.»