Vir nemoris

Liber II

___________________________________________________

Torrida maturis feruebat solibus aestas,

dum messor positis fruges terit impiger armis,

frigidulasque aures, uiridemque in montibus herbam

695

lasciuae captant pecudes pecudemque magistri.

Cum male defensis citus instat moenibus hostis,

adgrediturque domos, incustoditaque adortus

tecta ruit; sed enim struit aggere dirupta et altos

adtollit muros et denso milite complet.

700

Sic, ubi per noctem lupus insidiatus ouili,

mutas carpit oues et gutture mandit hianti.

Fraudibus haec primum uictoria parta dolosis

cetera dedoceat, quin longius improba disce:

uni cura duci summarum credita rerum,

[26]

705

munia praesertim belli. Fidentia in ipsum

prorsus corda petunt, haec soluere uincula Galli.

intendunt artesque nouas noua pectore uersant

consilia et falsis texunt sermonibus astum

ambiguasque student in uulgus spargere uoces

710

scilicet (horrendum dictu!) quod uendidit auro

Dux patriam, certo perhibent secretaque ab hoste

munera parta tenet (quod saepius ante coacti

perficere, id factum iactant) ea fama uagatur

cuncta per ora uirum, studia in contraria miscet

715

ignarum uulgus, ciuiles excitat iras

alternumque metum et pagos rumoribus implet.

Hinc plures suspecta Ducis iam uerba uolutant

suspectosque putant gressus. Suadere uidentur

cuncta dolos. Miseri, quae tanta insania, ciues?

[128 ^r]

720

Sic mens nota uiri? Sic nota est Gallia uobis?

Sed tantum ingenuis mendacia mentibus obstant

arte laborata et pictam referentia formam

et libertatis tantum imperiosa cupido

sollicitat. Turbati animi nec parcere bello

725

nec pugnare audent. Diuerso fluctuat aestu

plebs ignara doli sensusque per omnia uersat.

Paucos ira mouet seu uirtus tendere contra.

Dux fatum patriae timet in discrimine famae

uixque suo inclinata ruit sub pondere moles.

――――――

127^v, 706 potant err. V // 714 et studia T² V // 128^r, 729 uix que err. V.