Hieronymi Cardani

de propria vita liber

____________________________________________________________________________

capvt xxxv

Alumni atque discipuli

―――――

Primus eorum fuit Ambrosius Bizozorus qui euasit in nauis Epidauricae gubernatorem, uir ingeniosus et audax. Secundus Ludouicus Ferrarius, Bononiensis, qui mathematicas et Mediolani et in patria sua professus est, et singularis in illis eruditionis. Tertius Io. Baptista Boscanus, qui a libellis fuit Senatus Caesaris ¹⁾ Caroli V. Quartus Gaspar Cardanus, nepos alterius Gasparis patruelis mei; hic medicus euasit et medicinam publice Romae professus est. Quintus Fabricius Bozius, qui militiam exercuit Taurinae regionis, licet pro Mediolanensi habitus. Sextus Iosephus Amatus, a secretis proconsulis prouinciae nostrae. Septimus Christophorus Saccus, qui tabellio publicus factus est. Octauus Hercules Vicecomes, musicus, iuuenis lepidus et gratiosus. Nonus Benedictus Cataneus, Papiensis, qui operam dedit Iurisprudentiae. Decimus Io. Paulus Euphomia, musicus et satis eruditus. Vndecimus Rodulphus Syluester, Bononiensis, qui euasit medicus et Romae dum haec scribimus medicinam exercet. Duodecimus Iulius Pozus, Bononiensis: hic solus deseruit uadimonium. Tertius decimus Camillus Zanolinus, et ipse Bononiensis, medicus et tabellio publicus elegantis consuetuetudinis. Quartus decimus Octauius Pitius, Calabrensis, qui nunc mecum est.

Ex his praestantissimi secundus, quartus et undecimus, sed duo priores in iuuenta obiere, secundus annorum XLIII, quartus nondum XL ingressus:

«Immodicis breuis est aetas et rara senectus

Quicquid amas, cupias, non placuisse nimis.»

――――――――

1) Caesaris MNS : Ceasaris D.