De imitatione Christi

Admonitiones ad

spiritualem vitam utiles.

[Liber I]

____________________________________________________________

DE PROVIDENTIA IN AGENDIS.

CAPITVLVM  IIII.

Non est credendum omni verbo nec instinctui: sed caute et longanimiter res est secundum Deum ponderanda. Pro dolor saepe malum facilius quam bonum de alio creditur et dicitur: ita infirmi sumus. Sed perfecti viri non facile credunt omni enarranti; quia sciunt infirmitatem humanam ad malum proclivam: et in verbis satis labilem. Magna sapientia, non esse praecipitem in agendis: nec pertinaciter in propriis stare sensibus. Ad hanc etiam pertinet non quibuslibet hominum verbis credere: nec audita vel credita mox ad aliorum aures effundere. Cum sapiente et conscientioso viro consilium habe; et quaere potius a meliore instrui: quam tuas adinventiones sequi. Bona vita facit hominem sapientem secundum Deum: et expertum in multis. Quanto quis in se humilior fuerit et Deo subiectior: tanto in omnibus erit sapientior et pacatior.