Vita S. Elisabeth

Epilogus

________________________________________________________________

Epilogus brevis miraculorum

S. Elisabeth (Elisabethenkirche Marburg, ca. 1240)

PORRO sicut electa Dei famula Elizabeth beatissima mirandis virtutum signis in vita claruerat, sic et a die transitus sui beati usque in praesens per diversas mundi partes praeclaris miraculorum prodigiis, divina eam potentia glorificante, coruscat. Nam, coecis, mutis, surdis, et claudis, hydropicis, daemoniacis, et leprosis, naufragis, et captivis, ipsius meritis remedia conferuntur: omnibus quoque morbis, necessitatibus, et periculis subvenitur. Sed et multis mortuis, puta sedecim,per ipsam mirifice suscitatis, innotescit fidelibus mirificans Sanctam suam magnificentia virtutum Altissimi. Cui est honor et gloria per infinita secula, Amen.