Vita S. Elisabeth

Liber VIII

________________________________________________________________

CAPUT IX

De solenni canonizatione

sanctae Elizabeth

TUNC praesentibus venerabilibus viris, Hierosolymitano videlicet et Antiocheno Patriarchis, et multis reverendis Patribus, Archiepiscopis et Episcopis, aliisque quam plurimis Praelatis cum Cleri religiosorumque ac populi innumerabili multitudine, facta processione festiva, in die magno festivitatis Pentecostes, septimo Calendas Junii canonizavit illam felicem et benedictam Elizabeth: dans illi nomen grande, juxta nomen magnorum, qui sunt in coelis, et sanctis nomen ejus connumerans, et connominans, ipsam inter sanctos invocavit; ac in Sanctorum catalogo annotari praecepit: indicensque constituit per scripturam, demandans, ut dies sacrae migrationis ejus annua devotione inter sanctorum festivitates ab universali Ecclesia venerabiliter recolatur. O felicem et religiosissimam feminam, quam cum tot sanctis Patribus ac sapientibus viris Apostolicae auctoritatis celsitudo eo honoris fastigio, quo majorem militantis Ecclesiae dignitas non habet, rectissime et reverentissime sublimavit. Et ecce inter sanctos sors illius est, et inter filios altissimi computata.

Peractum est hoc Canonizationis Officium Perusii in Conventu Fratrum Ordinis Praedicatorum, Anno Incarnationis Dominica Millesimo Ducentesimo Tricesimo Quinto, Sexto Kalendas Junii. Constitutum est autem ibidem Altare in honorem ipsius, quod idem summus Pontifex Gregorius devotione pia honorans, dotavit triginta dierum indulgentiam advenientibus quotidie, et adorantibus misericorditer relaxando. Fratres quoque illius conventus festum diem beatae Elizabeth valde solenniter recolunt, et devote officium tam nocturnum quam diurnum, sub melodia officii patris sui sancti Dominici celebriter peragentes.