Vita S. Elisabeth

Liber VIII

________________________________________________________________

CAPUT I

Quomodo sancta Elisabeth

mortem suam praedixit

CUM beata Elizabeth de aerumnis et laboribus hujus mundi ad aeternitatis gloriam transitura esset, apparens ei in visu Dominus, vocavit eam, dulciter loquens ei: Veni dilecta mea in praeparata tibi tabernacula ab aeterno. Jam vero tunc aegrotavit vir Dei Magister Conradus, de oppido Marburg Sacerdos, et gravi infirmitatis molestia torquebatur. Et introivit ad eum visitandum infirmorum consolatrix, Dei famula, Elizabeth. Factum est autem dum fabularentur invicem, interrogavit eam sacerdos infirmus, dicens: Quomodo, mi domina et filia, post mortem meam statum tuum proponis ordinare? Tunc Dei famula de morte sacerdotis nil respondens, sui ipsius obitum eidem indubitanter praedixit, quem Spiritu Sancto praecognoverat revelante. Et ecce die quarta post haec verba aegritudinem Dei famula incidit, in qua ex hac luce subtracta mortem perdidit, et vitam aeternam adiit.