Regulae cenandi

ca. 1200

________________________________________________________________

Ms. B

Quisquis es in mensa primo de paupere pensa.

Nam cum pascis eum pascis amice deum.

Nescit homo plenus quam uitam ducat egenus.

Nemo cibum capiat donec benedictio fiat.

5

Nec capiat sedem nisi quam uult qui regit edem.

In mensa caue quot sint res non numerare.

Et mundi digiti tibi sint ungues politi.

Ne graue sit socijs aut noceat alijs.

Qui uult potare debet prius os uacuare.

10

Sint tamen illius labia tersa prius.

In mensa tacta non sit bucella redacta.

Qui tenet in mensa cubitum uel bracchia tensa.

Non est urbanus si fuerit corpore sanus.

In mensa cubitum ponere sit uetitum.

15

Nec moueas famulo uirgam nec catulo.

Ac ultra mensam spiritum nec eieceris unquam.

Nec mundent dentes ex cultello comedentes.

Sal non tangatur esca quod uase locatur.

Mensa submota prius ablue postea pota.