De diversis artibus libri III

Liber tertius

____________________________________________________________

Caput LXVII.

De purificatione cupri.

TOLLE patellam ferream cujus magnitudinis volueris, et lini eam interius et exterius argilla fortiter macerata et mixta, et diligenter exsiccata. Deinde pone eam ante fornacem ferrarii super carbones, ita ut cum folles flaverint, ventus partim interius partim superius procedat et non inferius. Et circumpositis minutis carbonibus, aequaliter inpone cuprum, et superadde congeriem carbonum. Quod cum diu sufflando fuerit liquefactum, discooperi et mox minutam carbonum favillam super illud proice, et cum ligno gracili et sicco quasi miscendo commove, videbisque statim plumbum combustum ipsi favillae quasi gluten adhaerere. Quo ejecto iterum carbones superpone, ut primo diu sufflans, rursumque discooperi, et tunc fac ut ante fecisti. Quod tamdiu facies donec plumbum omnino excoquendo eicias. Deinde infunde super infusorium, quod ad hoc aptaveris, et sic probabis si purum sit. Tene illud cum forcipe ita candens, prius quam refrigeretur et percute grandi malleo super incudem fortiter, et si frangitur aut finditur, denuo oportebit illud liquefieri sicut prius. Si vero sanum permanserit, refrigerabis in aqua, et aliud eodem modo coques. Hoc cuprum vocatur torridum. Ex hoc cupro quicquid facere volueris ductili opere, in imaginibus, et bestiis et avibus, in turibulis et diversis vasis, in limbis tabularum, in filis et catenis, ad deaurandum operari poteris. Ex hoc cupro confice auricalcum cum adjectione calaminae, eodem modo quo superius aes caldariorum composuisti. Quod cum quater aut quinquies recoxeris in vasculis furno impositis, quicquid exinde in diversorum operum varietate fuderis, optime deaurare poteris.