R u o d l i e b
F r a g m e n t u m   I I

______________________________

f.4ar

Illius herbe vim medici dicunt fore talem:
Torridula trita cum parvo polline mixta,
Hinc pilule facte si fient more fabelle
Et iaciantur aquis, quicumque comederit ex his

5

Piscis, quod nequeat subtus, supra sed aquam net.

Inter tres digitos pilulas tornando rotundas
Dilapidat stagno; quo pisces agmine magno
Conveniunt avide capiendo pilam sibi quisque.
Quam qui gustabant, sub aqua plus nare nequibant,

10

Sed quasi ludendo saltus altos faciendo
Undique diffugiunt nec mergere se potuerunt.
Ille sed in cimba percurrit remige stagna

Post pisces, virga cogens ad litora sicca.
Quos duo cum funda circumcinxere sub unda,

15

Cum terram peterent, ad aquam resalire nequirent.
Sic piscando sibi ludum fecitque sodali.
Tunc iussere cocos prunis assare minores,
Maiores scuto regi portant ioculando:
«Venari melius hodie nos non poteramus.»

20

«Retibus aut hamis hos cepistis ve sagenis?»
«Non sic piscamur», ait incola, «sed dominamur
Piscibus, e fundo veniant ad nos sine grato,
Et supra stagnum saliendo iocum dare magnum.
Dum sub aquam nequeunt satis et saltando fatiscunt,

25

Hos tandem virga facimus requiescere terra.»
«Hoc volo» rex dixit, «speculari, copia dum fit.»

Plinius herbarum vires scribens variarum
Laudat buglossam res ad multas nimis aptam.
In validum potum, dicit, qui ponat eandem,

30

Quantumcumque bibat, quod is ebrius haut fore posset.

f.4av

(P)ulveris eiusdem, describit Plinius idem,
Qui serat in carnem, si forte cani det eandem,
(Tem)pore quod modico canis obcecetur ab ipso,
(E)t quicquid cecum fuerit sine lumine natum,

35

(E)ius si gustet, quod mox visum cito perdat.
Herbe venator cuius studiosus amator
(I)n silvam pergit, plures hirpos ubi rescit,
(C)apram cum fune secum ducente sodale.
(Q)uam cedunt inibi lato sub tegmine fagi

40

(A)bstrahendo cutem, cedunt per frustaque carnem.
(Q)uam superaspergunt cum pulvere, pelle recondunt.
(A)mboque scandebant super arbore vel residebant,
(E)xul et horribiles hirporum dans ululatus
(N)unc veterum grandes, iuvenum graciles modo voces

45

(E)xprimit, ut veros hirpos ululare putares.
(Q)uo dum conveniunt hirpi, capram repererunt,
(Q)uam discerpebant in momentoque vorabant;
(N)ec procul hinc abeunt, ambo quam lumina perdunt.

(Ta)libus et paribus instat miles peregrinus

50

(Af)fectans sese cunctis, valet ut studiose,
(I)n magna pace regnum dum stat vel honore:
(Al)terius regni marhmanni valde benigni
(No)stris, a nostris is amor servatur et ipsis.
(Al)terutrique meant emptum, quodcumque volebant,

55

(Ve)ctigal dantes ve(c)tigal et accipientes.
(N)ubunt hinc illuc natasque suas dederant huc,
(Com)patres fiunt vel, qui non sunt, vocitabant.
(Hi)c amor inter eos per multos duruit annos,
(Do)nec peccatis sunt rupta ligamina pacis.

60

(E)xosor pacis nostri generalis et hostis
(Se)men zizanie non cessat multiplicare,
(E)st ubicumque fides, ut stet ea non ibi perpes.
(Q)uo succendente fit grandis vverra repente
(Q)uodam mercato multo populo glomerato,

65

Pro causa vili sunt occisi quia multi.