Liber regulae pastoralis

Pars secunda

_________________________________________________________

Sancti Gregorii I Magni,

Romani Pontificis

REGULAE

PASTORALIS

LIBER.

SECUNDA PARS.

Caput primum.

Is qui ad regimen ordinate pervenerit, qualem se

in ipso regimine debeat exhibere.

Tantum debet actionem populi actio transcendere praesulis, quantum distare solet a grege vita pastoris. Oportet namque ut metiri sollicite studeat quanta tenendae rectitudinis necessitate constringitur, sub cujus aestimatione populus grex vocatur. Sit ergo necesse est cogitatione mundus, actione praecipuus, discretus in silentio, utilis in verbo, singulis compassione proximus, prae cunctis contemplatione suspensus, bene agentibus per humilitatem socius, contra delinquentium vitia per zelum justitiae erectus, internorum curam in exteriorum occupatione non minuens, exteriorum providentiam in internorum sollicutidine non relinquens. Sed haec quae breviter enumerando perstrinximus, paulo latius replicando disseramus.