Hymni a Gregorio conscripti

Hymnus II

_________________________________________________________

Alius.

1.

Nocte surgentes vigilemus omnes,

Semper in psalmis meditemur, atque

Voce concordi Domino canamus

Dulciter hymnos.

2.

Ut pio Regi pariter canentes,

Cum suis sanctis mereamur aulam

Ingredi caeli, simul et beatam

Ducere vitam.

3.

Praestet hoc nobis Deitas beata

Patris ac Nati, pariterque sancti

Spiritus, cujus reboat in omni

Gloria mundo.

Amen.