Breviatio pedum

Textus:

Caesii Bassi Fragmentum de metris

in: Grammatici Latini, Vol. VI, pp. 307-312

ed. Heinrich Keil, Leipzig: Teubner, 1874

___________________________________________________________

[Bassus]

Breviatio pedum

Pedes disyllabi sunt numero quattuor. pyrrichius ex duabus brevibus temporum duum, ut deus; sed hunc alii hegemona appellaverunt, alii dibrachyn, alii pariambum. spondeus ex duabus longis temporum quattuor, ut heros. iambus ex brevi et longa temporum trium, ut dies. trochaeus ex longa et brevi temporum trium, ut Roma; sed hunc alii chorium appellaverunt, alii cordacem.

Pedes trisyllabi numero sunt octo. tribrachys ex tribus brevibus temporum trium, ut Helena; sed hunc alii trochicum appellaverunt, alii pygnoma, alii brachysyllabon: Cicero eundem in oratore etiam trochaeum appellavit, molossus ex tribus longis temporum sex, ut Aeneas; hunc alii hippion appellaverunt. bacchius ex brevi et duabus longis temporum quinque, ut Athenae. palimbacchius ex duabus longis et brevi temporum quinque, ut natura. anapaestus ex duabus brevibus et longa temporum quattuor, ut nebulae. dactylus ex longa et duabus brevibus temporum quattuor, ut Romulus. amphibrachys ex brevi longa et brevi temporum quattuor, ut dicaris; et hunc alii mesiten, alii scolium appellaverunt. creticus ex longa brevi et longa temporum quinque, ut sanitas; et hunc alii amphimacrum appellant.

Tetrasyllabi pedes <sunt> numero sedecim. proceleumaticus, qui fit ex duobus pyrrichiis, id est ex quattuor brevibus syllabis, et est temporum quattuor, ut habilior. dispondeus, qui fit ex duobus spondeis, id est ex [p. 308] quattuor longis syllabis, temporum octo, ut Maecenates. ionicus minor, qui fit ex pyrrichio et spondeo, id est ex duabus brevibus syllabis et duabus longis, temporum sex, ut Diomedes. ionicus maior, qui fit ex spondeo et pyrrichio, id est ex duabus longis et duabus brevibus syllabis, temporum sex, ut Iunonius. antispastus, qui fit ex iambo et trochaeo, id est ex brevi duabus longis <syllabis> et brevi, temporum sex, ut Clytaemnestra. choriambus, qui fit ex trochaeo sive chorio et iambo, id est ex longa duabus brevibus syllabis et longa, temporum sex, ut nobilitas. diiambus qui fit ex duobus iambis, id est ex brevi et longa et item brevi et longa syllabis, temporum sex, ut propinquitas. ditrochaeus, qui et dichorius, qui fit ex duobus trochaeis sive choriis, id est ex longa brevi et item longa brevi syllaba, temporum sex, ut dimicare. epitritus primus, qui fit ex iambo et spondeo, id est <ex> brevi et tribus longis syllabis, temporum septem, ut venenati. epitritus secundus, qui fit ex trochaeo et spondeo, id est ex longa et brevi et duabus longis syllabis, temporum septem, ut Nicomedes. epitritus tertius, qui fit ex spondeo et iambo, id est ex duabus longis brevi et longa syllabis, temporum septem, ut heroici. epitritus quartus, qui fit ex spondeo et trochaeo, id est ex tribus longis et brevi syllabis, temporum septem, ut nutritura. paeon primus, qui fit ex trochaeo et pyrrichio, id est ex longa et tribus brevibus syllabis, temporum quinque, ut Demodocus. paeon secundus, qui fit ex iambo et pyrrichio, id est ex brevi longa et duabus brevibus syllabis, temporum quinque, ut idoneus. paeon tertius, qui fit ex pyrrichio et trochaeo, id est ex duabus brevibus longa et brevi <syllabis>, temporum quinque, ut Menedemus. paeon quartus, qui fit ex pyrrichio et iambo, id est ex tribus brevibus et longa syllabis, temporum quinque, ut celeritas. his adiciunt multi unum pentasyllabum, quem Cicero dochmium vocat, qui constat ex brevi duabus longis brevi et longa syllabis, ut est senatoriae et, ut idem Cicero posuit, «amicos tenes».

De compositionibus

Ex trochaeo et molosso, id est ex longa et brevi et tribus longis, ut dolore compulsum. ex trochaeo et ionico minore, id est ex longa et brevibus tribus et longis duabus, regina superorum. ex trochaeo et [p. 309] choriambo, id est ex longa una et brevi una et longa una et brevibus duabus et longa una, indigna perpetior. ex trochaeo et ionico maiore, id est ex longa una et brevi una et longis duabus et brevibus duabus, astra caelestia. ex trochaeo et pentasyllabo, cuius media longa est, id est ex longa una et brevibus tribus et longa una et brevibus duabus, maiestate miserabili.

Ex tribrachy et molosso, id est ex brevibus tribus et longis tribus, deserere compellor. ex tribrachy et ionico minore, id est ex longis quinque et longis duabus, incredibilia tolerando. ex tribrachy et choriambo, id est ex brevibus tribus et longa una et brevibus duabus et longa una, varia concupiens. ex tribrachy et ionico maiore, id est ex brevibus tribus et longis duabus et brevibus duabus, rapior in turbines. ex tribrachy et pentasyllabo, cuius media longa sit, id est ex brevibus quinque et longa una et brevibus duabus, temere revocabitur.

Item secundum genus compositionis. ex spondeo et bacchio, id est ex longis duabus et brevi una et longis duabus, hostes subacti. ex spondeo et paeone quarto, id est ex longis duabus et brevibus tribus et longa una, bellum reficiunt. ex spondeo et paeone secundo, id est ex longis duabus et brevi una et longa una et brevibus duabus, armis repleverat.

Ex anapaesto et bacchio, id est ex brevibus duabus et longa una et brevi una et longis duabus, aditus sonantes. ex anapaesto et paeone secundo, id est ex brevibus duabus et longa una et brevi una et longa una et brevibus duabus, iaculis frequentibus. ex anapaesto et paeone quarto, id est ex brevibus duabus et longa una et brevibus tribus et longa una, pedites refugiunt.

Ex amphimacro et spondeo, id est ex longa una et brevi una et longis tribus, obvios sternunt. ex amphimacro et anapaesto, id est ex longa una et brevi una et longa una et brevibus duabus et longa una, comminus gladiis. ex amphimacro et dactylo, id est ex longa una et brevi una et longis duabus et brevibus duabus, victoria praediti. ex amphimacro et bacchio, id est ex longa una et brevi una et longa una et brevi una et longis duabus, hostibus repulsis.

Ex palimbacchio et spondeo, id est ex longis duabus et brevi una et longis duabus, praeclara virtus. ex palimbacchio et anapaesto, id est ex [p. 310] longis duabus et brevibus tribus et longa una, prudentis animo. ex palimbacchio et dactylo, id est <ex> longis duabus et brevi una et longa una et brevibus duabus, laudanda iugiter.

Ex paeone tertio et spondeo, id est ex brevibus duabus et longa una et brevi una et longis duabus, repetebat actus. ex paeone tertio et anapaesto, id est ex brevibus duabus et longa una et brevibus tribus et longa una, superatus animus. ex paeone tertio et dactylo, id est ex brevibus duabus et longa una et brevi una et longa una et brevibus duabus, aliena quaeritans.

Ex amphibrachy et spondeo, id est ex brevi una et longa una et brevi una et longis duabus, repulsus hostis. ex amphibrachy et anapaesto, id est ex brevi una et longa una et brevibus tribus et longa una, repente capitur. ex amphibrachy et dactylo, id est ex brevi una et longa una et brevi una et longa una et brevibus duabus, parantur agmina.

Ex spondeo et iambo, id est ex longis duabus et brevi una et longa una, causas videt. ex spondeo et tribrachy, id est ex longis duabus et brevibus tribus, sumptus temere.

Ex anapaesto et iambo, id est ex brevibus duabus et longa una et brevi una et longa una, fremitus gravis. ex anapaesto et tribrachy, id est ex brevibus duabus et longa una et brevibus tribus, trepidi fugiunt.

Ex spondeo iambo et spondeo, id est ex longis duabus et brevi una et longis tribus, cuncti cavent bellum. ex spondeo iambo et anapaesto, id est ex longis duabus et brevi una et longa una et brevibus duabus et longa una, victi malis trepidant. ex spondeo iambo et dactylo, id est ex longis duabus et brevi una et longis duabus et brevibus duabus, rostris secant gurgites.

Ex duobus iambis et spondeo, id est ex brevi una et longa una et brevi una et longis tribus, bonos docet cives. ex duobus iambis et dactylo, id est ex brevi una et longa una et brevi una et longis duabus et brevibus duabus, manu struit moenia.

Ex trisyllabo cuius media brevis sit, id est [ex] cretico, iambo et spondeo, id est ex longa una et brevi una et longa una et brevi una et longis tribus, proelium cupit fortis. ex trisyllabo cuius media brevis sit, id est [ex] cretico, iambo et dactylo, id est ex longa una et brevi una et longa una et brevi una et longis duabus et brevibus duabus, turbines timet fluctuum. ex trisyllabo cuius media brevis sit, id est cretico, iambo et anapaesto, id est ex longa una et brevi una et longa una et brevi una et longa una et brevibus duabus et longa una, gurgites secant trepidi. ex [p. 311] trisyllabo cuius media brevis sit, id est cretico, trochaeo et spondeo, id est ex longa una et brevi una et longis duabus et brevi una et longis duabus † Laribus auget urbem.

Ex spondeo et epitrito primo, id est ex longis duabus et brevi una et longis tribus, pacem repromisit. ex spondeo et epitrito secundo, id est ex longis tribus et brevi una et longis duabus, bellum suscitavit.

Ex trisyllabo cuius media brevis sit, id est cretico, et epitrito primo, id est longa una et brevi una et longa una et brevi una et longis tribus, hostibus resistentes. ex trisyllabo cuius media brevis sit, id est cretico, et epitrito secundo, id est ex longa una et brevi una et longis duabus et brevi una et longis duabus, exercitum compulerunt.

Ex iambo et epitrito primo, id est ex brevi una et longa una et brevi una et longis tribus, fugam capessebant. ex iambo et epitrito secundo, id est ex brevi una et longis duabus et brevi una et longis duabus, faces sustulerunt.

Ex spondeo et pentasyllabo cuius duae primae breves sint, iustus rationalis, id est duae primae longae, duae consequentes breves et tres ultimae longae, cuius exemplum sursum. ex spondeo et pentasyllabo cuius secunda brevis sit, multum praeferebantur, id est tres primae longae, quarta brevis et tres ultimae longae, cuius exemplum sursum.

* Ex trisyllabo cuius media brevis sit, id est cretico, et pentasyllabo cuius secunda brevis sit, instantia comprobaturus, id est ex prima longa, secunda brevi, tertia et quarta longa, quinta brevi et tribus ultimis longis, cuius exemplum sursum est.

Ex iambo et pentasyllabo, cuius duae primae breves sint, rates reparabantur, id est ex prima brevi, secunda longa, tertia et quarta brevi et tribus ultimis longis, cuius exemplum sursum est. ex iambo et pentasyllabo cuius secunda brevis sit, bonus consulebatur, id est ex prima [p. 312] brevi, secunda et tertia longa, quarta vero brevi et tribus ultimis longis, cuius exemplum sursum est.

Genera versuum

Epos, quod dactylicum dicitur, iambicum, trochaicum, anapaesticum, antispasticum, choriambicum, ionicum ἀπὸ μείζονος, ionicum ἀπὸ ἐλάσσονος, quod ad rhythmum tibicinum convenit. nonum paeonicum dicitur.

Poeticae species Latinae

Epos sive dactylicum, epigramma, iambica, lyrica, tragoedia, satira, praetextata, comoedia, tabernaria, Atellana, Rhintonica, mimica.