Libro de los estados

El segundo libro

___________________________________________________

[Capítulo XLIX]

[El xlix° capítulo fabla en cómmo Julio dixo al infante quáles son los estados más pequennos de la clerezía.]

«Sennor infante,» dixo Julio, «grant plazer he por lo que [dezides que] en los otros estados más pequennos de la cle{122c}rezía vos fablé más avreviadamente. Et por ende vos digo que en pos estos estados de que vos yo fablé, que ay otros estados en las eglesias catedrales, así commo arçidianos et maestrescuelas et tesureros et chantres et otros canónigos et rraçioneros et medio rraçioneros. [Et] todos éstos an sus ofiçios en las eglesias [catedrales]: los arçidianos, visitar sus arçidianadgos; et los otros, cada uno segund lo que a de fazer guardando las costunbres que son de cada eglesia. Ca porque en todas las eglesias non lo usan en una manera, por ende non lo podría dezir así commo es. Et todos estos que son dichos pueden meresçer o desmeresçer segund guardaren sus vidas et sus estados.»