Libro de los estados

El segundo libro

___________________________________________________

[Capítulo XVI]

El capítulo xvi° fabla en cómmo Julio provava al infante quál fue la razón por que los reys de Sabaa vinieron adorar a Jhesu Christo.

«Otrosí, la rrazón por quel vinieron adorar los rreys [de Sabaa] paresçe a mí que fue por dar a entender que Él era el sennor del mundo et que todos los rreys eran en el su poder et que todos lo avían de obedesçer. Et el oro, ençienso et mirra que ellos le enpresentaron fue por dar a entender quién fue Jhesu Christo. Et esto fazían ellos prophetizando lo que avía de ser; ca por el oro que ofreçieron se entendía que todo el mundo era en su poder et la su gran nobleza; et por el ençienso se entendía el sacrifiçio que avía de seer fecho del su cuerpo; et por la mirra, que es muy amarga, la amargura de la su muerte.»