Libro de los estados

El primer libro

___________________________________________________

[Capítulo XX]

El xx° capítulo fabla en cómmo Julio dixo al rrey que a él acaesçiera así que era natural de una tierra que era muy alongada désta et aquella tierra avía nonbre Castiella.

«Sennor rrey, a mí acaesçió así: Yo só natural de una tierra que es muy alongada desta vuestra, et aquella tierra a nonbre Castiella. Et seyendo yo ý más mançebo que agora, acaesçió que nasció un fijo a un infante que avía no[n]bre don Manuel, et fue su madre donna Beatriz, condesa de Saboya, muger del dicho infante, [et le] pusieron no[n]bre don Johan. Et luego que el ninno nasció tómele por criado et en mi guarda. Et desque fue entendudo alguna cosa punné yo en le mostrar et le acostunbrar lo más et lo mejor que yo pude. Et desque moré con él grant tienpo et entendí que me podía escusar, fui pedricando por las tierras la ley et fe católica. Et después torné a él algunas vezes, et sienpre le fallé en grandes guerras, a vezes con grandes omnes de la tierra et a vezes con el rrey de Aragón, et a vezes con el rrey de Granada, et a vezes con amos. Et agora, quando de allá partí, estava en muy grant guerra con el rrey de Castiella, que solía ser su sennor. Et por las grandes guerras quel acaesçieron et por muchas cosas que vio et que pasó despartiendo entre él et mí, sope yo por él muchas cosas que pertenesçen a la cavallería, de que yo non sabía tanto, porque só clérigo et el mío ofiçio es más de pedricar que usar de cavallería. Et agora, sennor, que só en vuestra tierra, si vos veedes que puedo fazer alguna cosa que sea vuestro serviçio, guardando mi ley, aparejado só para lo fazer muy de buen talante.»