Libro de los estados

El primer libro

___________________________________________________

[Capítulo I]

El primer capítulo del primer libro es el prólogo: de cómmo don Johan conpuso este libro et le enbía a don Johan, arçobispo de Toledo, su cunnado, fijo del muy noble rrey don Jaime de Aragón.

Hermano sennor don Johan, arçobispo de Toledo: Yo, don Johan, fijo del infante don Manuel, adelantado mayor de la frontera et del reino de Murçia, me encomiendo en la vuestra graçia et en las vuestras santas oraçiones. Hermano sennor, vós sabedes que los tienpos et las cosas que en ellos acaesçen mudan los fechos. Et todos los philósofos et las prophetas et después los sanctos, segunt las cosas que les acaesçieron en cada tienpo, así dizían et fazían sus dichos et sus fechos. E aun todos los omnes en este nuestro tienpo de agora así lo fazen, ca segunt les acaesçen en los fechos, así an de fazer et de dezir. Et por esta manera oganno fiz un libro, que vos envío. Et fallaredes que lo demás es fe[46d]cho segund las cosas que entonçe acaesçíen o que eran acaesçidas. Et acaesçe que agora estó acaesçiere, commo dixo Boesço: «carmina qui quondam etc.»