Ἀνθολογία Παλατινή

1. Τὰ τῶν χριστιανῶν ἐπιγράμματα

______________________________________________________________________

12.

Εἰς τὴν ἁγίαν Εὐφημίαν

τὴν Ὀλυβρίου

Εἰμὶ δόμος Τριάδος, τρισσὴ δέ με τεῦξε γενέθλη.

πρώτη μὲν πολέμους καὶ βάρβαρα φῦλα φυγοῦσα

τεύξατο καί μ᾽ ἀνέθηκε Θεῶι ζωάγρια μόχθων

Θευδοσίου θυγάτηρ Εὐδοξία· ἐκ δέ με κείνης

5

Πλακιδίη κόσμησε σὺν ὀλβίστωι παρακοίτηι·

εἰ δέ που ἀγλαΐης ἐπεδεύετο κάλλος ἐμεῖο,

τήνδε μοι ὀλβιόδωρος ὑπὲρ μνήμης γενετήρων

δῶκεν Ἰουλιανὴ καὶ ὑπέρτατον ὤπασε κῦδος

μητέρι καὶ γενέτηι καὶ ἀγακλέι μητρὶ τεκούσης,

10

κόσμον ἀεξήσασα παλαίτερον εἰς ἐμὸν ἔργον.

Ἀνώνυμος