Μέλη

___________________________________________________

Μελῶν α´

1 D

Hephaest. Peri poi. 4,8

Γουνοῦμαί σ᾽ ἐλαφηβόλε,

ξανθὴ παῖ Διὸς, ἀγρίων

δέσποιν᾽ Ἄρτεμι θηρῶν,

ἥ κου νῦν ἐπὶ Ληθαίου

5

δίνηισιν θρασυκαρδίων

ἀνδρῶν ἐσκατορᾶις πόλιν

χαίρουσ᾽· οὐ γὰρ ἀνημέρους

ποιμαίνεις πολιήτας.

2 D

Dio Prus. or. 2,62

Ὦναξ, ὧι δαμάλης Ἔρως

καὶ Νύμφαι κυανώπιδες

πορφυρέη τ᾽ Ἀφροδίτη

συμπαίζουσιν, ἐπιστρέφεαι

5

δ᾽ ὑψηλὰς ὀρέων κορυφάς,

γουνοῦμαί σε, σὺ δ᾽ εὐμενὴς

ἔλθ᾽ ἡμίν, κεχαρισμένης

δ᾽ εὐχωλῆς ἐπακούειν.

Κλευβούλωι δ᾽ ἀγαθὸς γενεῦ

10

σύμβουλος, τὸν ἐμόν γ᾽ ἔρω-

τ᾽, ὦ Δεύνυσε, δέχεσθαι.

3 D

Herodian. Peri schem.

Κλευβούλου μὲν ἔγωγ᾽ ἐρέω,

Κλευβούλωι δ᾽ ἐπιμαίνομαι,

Κλεύβουλον δὲ διοσκέω.

4 D

Athen. 13,564d

Ὦ παῖ παρθένιον βλέπων,

δίζημαί σε, σὺ δ᾽ οὐ κλύεις,

οὐκ εἰδώς, ὅτι τῆς ἐμῆς

ψυχῆς ἡνιοχεύεις.

5 D

Athen. 13,599c

Σφαίρηι δηὖτέ με πορφυρέηι

βάλλων χρυσοκόμης Ἔρως

νήνι ποικιλοσαμβάλωι

συμπαίζειν προκαλεῖται.

5

ἣ δ᾽ – ἔστιν γὰρ ἀπ᾽ εὐκτίτου

Λέσβου – τὴν μὲν ἐμὴν κόμην –

λευκὴ γάρ – καταμέμφεται,

πρὸς δ᾽ ἄλλην τινὰ χάσκει.

6 D

Schol. TLV Hom. Ο 192

Μεὶς μὲν δὴ Ποσιδηϊών

ἕστηκεν, νεφέλας δ᾽ ὕδωρ

βαρύνει, βαρὺ δ᾽ ἄγριοι

χειμῶνες παταγεῦσι.

8 D

Strab. 3,12,14

ἐγὼ τ᾽ ἂν οὔτ᾽ Ἀμαλθίης

βουλοίμην κέρας οὔτ᾽ ἔτεα

πεντήκοντὰ τε κἀκατόν

Ταρτησσοῦ βασιλεῦσαι

9 D

editio Snell non habet.

Eust. Od. 1542.47

ἀλλ᾽ ὦ τρὶς κεκορημένε

Σμερδίη

11 D

editio Snell non habet.

Athen. 15, 687

τί μὲν πέτεαι

συρίγγων κοϊλώτερα

στήθεα χρισάμενος μύρωι;

15 D

editio Snell non habet.

Et. Gen. B p. 266 (Et. Mag. 713,7)

οὗτος δηὖτ᾽ Ἰηλυσίους

τίλλει τοὺς κυανάσπιδας.

16 D

editio Snell non habet.

Athen. 12, 533e

ξανθῆι δ᾽ Εὐρυπύληι μέλει

ὁ περιφόρητος Ἀρτέμων..

17 D

Hephaest. Peri poi. 7,2

Ἀρθεὶς δηὖτ᾽ ἀπὸ Λευκάδος

πέτρης ἐς πολιὸν κῦμα κολυμβέω μεθύων ἔρωτι.

18 D

Athen. 4,177a,182c

∪  ∪  –  τίς ἐρασμίην

τρέψας θυμὸν ἐς ἥβην τερένων ἡμιόπων ὑπ᾽ αὐλῶν

ὀρχεῖται; ∪  ∪  –  ∪  –