Redentiner Osterspiel

O crux ave, spes unica!

Salve arbor sanctissima,

Quam Ihesus sua gratia

Morte ditavit propria,

Et sacra Christi passio

Et sanguinis aspersio

Colendam omni populo

Consecravit in seculo.

Ad ejus nunc memoriam

Et passionis gloriam

Te adoro, te veneror,

Per te salvari deprecor.

Sis mea tu protectio

Et in cunctis defensio,

Intus et exterius

Conserves horis omnibus.

A maligno me protege

Crux alma omni tempore.

O crux tuum signaculum

Sit mihi propugnaculum.

A motibus illicitis

Et actu turpitudinis.

Contra omne periculum

Crux sit mihi umbraculum.

Ne cordis cogitatio

Aut carnis delectatio

Ad consensum me protrahat,

Crux me semper custodiat.

Amen.