Van schip rechte

Text:

Van schip rechte

in: Johann Martin Lappenberg

Hamburgische Rechtsalterthümer, Band 1:

Die ältesten Stadt- Schiff- und Landrechte Hamburgs

Hamburg: Johann August Meissner, 1845

Faksimile: Google

______________________________________________________________________________

Van schip rechte.

I.

De meine raet unde dhe borghere uan der stat uan Hamborch hebbet dit schiprecht ghewilkoret unde uth ghegheuen.

So welc use borgher kůmt in Flanderen, unde heuet he also uele copschattes also XIII sol. englis oder mer: he scal gheuen enen schilling englis to hanse vnde twe penninghe ulamis user urouwen sunte Marien.

To Vtrecht scal iewelc use borghere gheuen III sol. [uth]trechtis to hanse, unde twe penninghe user urowen. Vnde uan desseme ghelde, dat men aldus to hanse ghift, scal de olderman unde dhe dhenne dar sin dhe twe deil uordoen na eren willen, unde den dridden deil scal men in den bloc lecghene to nutschap.

II.

To Uttrecht binnen der stat scal men dhe hanse holden; also scal men och to Ostkerken in Ulanderen dhe hanse holden, unde anders nerghene, de olderman ne lecghe se anderswor mit der hansebrodere rade.

III.

Ein iewelc man user borghere scal des sunnendaghes komen to der morghensprake bi twen penninghen englis, id ne do eme noet, ofte he ne hebbe orlof uan deme oldermanne.

So we och dar gheladet wert umme claghe, vnde ne komet he nicht: he scal id beteren mit XII penninghen englis.

IIII.

Id ne scal nen use borghere den anderen uorclaghen uor dheme baliu, ofte uor dheme sculteten. So we so dat deit, de scal dat beteren mit III marken silueres to der stat kore, unde he scal och eme sinen schaden oprechten. Ein man scal den anderen uerclaghen in der morghensprake, unde dar scal men dat scheden mit rechte.

V.

Id ne mach nen man nen ordeil beschelden in der morghensprake, he ne moghe id besetten mit V uerdinghen; vnde so we dat beschelt, de scal id denne to Hamborg oppe dat hus theen.

VI.

So wan so ein man sin schip uerhuret to Norweghene oder to Gotlande, so scal he iewelkeme knapen gheuen to uorlone X sol. englis to XII weken, unde darna to iewelker weken X den. englis. To Ulanderen wart XII sol. hamborghere to VII weken, unde darna to iewelker weken IX penninghe englis. Al de wile dat ein man to dheme schore leghet, he ne darf nicht mer gheuen to der weken na der haluen marc den to der weken II sol.

VII.

So welc schipknape des nachtes buten schepe leghet sunder orlof, de scal id beteren mit IIII penninghen englis: dhe scolen nemen dhe schipheren unde de schipmanne.

VIII.

So welc schipman uan she weghen wederghift, ofte legherachtich wert, de scal wederkeren al sin uorlon; dat scolen opnemen dhe schipheren unde dhe schipmanne ghelik.

VIIII.

Ein iewelc schiphere scal uoren iewelkeme schipmanne to Norweghene unde uan den to Gotlande. Unde uan den V schippunt swares, ofte XX rechtere, ofte dat schip mit holte laden is, ne mach ein knape sine uoringhe nicht laden; de schiphere scal eme gheuen dar he sine urucht nimt, uan dheme punde also eme boret twisschen min unde mest.

Van Rotzeil [Rochelle] ein uat wines ofte V hode soltes. Van Enghelant ofte uan Irlande enen sac wůllen uan twen waghen.

Van Hamborg XVI verdere beres, oder IIII punt swares, oder ein picvat, oder ein woltvat asschen, oder ein hundert seuen uote holtes, oder ein half hundert waghenschotes, dat min den X sol. coft si, ofte ein hundert melevate, ofte ein half hundert molden, ofte lucghen, ofte enen wicschepel kornes, so welkere hande id si.

X.

Wirt ein schip ghehuret to winteruische to Norweghene, ofte to Schone, unde also dat schip kůmt to Enghelande ofte to Vlanderen, vnde willet dhe uruchtlude dat schip hebhen dor dhe Houede [Ärmelkanal]; se scolen dheme schipheren gheuen den dridden deil der urucht mer, also dat dhe erste urucht si dhe twe deil, unde dheme sturmanne unde iewelkeme schipmanne den dridden deil sines lones mer.

Is och ein schip ghehuret to Schone, unde slipthit des haringhes, vnde willet dhe uruchtlude to Norweghene: se scholen och gheuen den dridden deil der urucht mer. Unde den haring, den de sturman unde dhe schipmanne copen scolden to Schone, schal men in gheuen uth dheme boneke.

XI.

So wan ein schip uan Norweghen kůmt mit winteruissche, unde de schiphere dat schip uercoft: so sin ledich de sturman unde dhe schipmanne. De sciphere scal auer den uruchtluden huren ein goet scip, ofte se id hebben willet, dar se ere goed mede to hus uoren.

So wor so ein man sin schip uercoft, so scal he sinen schipmannen gheuen to XIIII nacht wekelon.

Leghet auer ein man sin schip to winterlaghe, so ne ghift he mer to achte daghen wekelon.

XII.

Id ne scal och nen schiphere sinen knapen orlof gheuen ofte laten oppe eneme olande, he ne hebbe wittelike broke dan. Also ne scal och nen knape sinen heren dar begheuen.

XIII.

Id ne mach och nen schiphere sin schip uor sunte Mertines daghe oplecghen to winterlaghe sunder der uruchtlude willen. Na sunte Mertines daghe ne scal och nen schiphere to der she seghelen to der uruchtlude willen.

XIIII.

So wor so ein schip tobricht, unde komt mit dheme brokenen schepe also uele to lande, also dhe urucht wert is: dar scal de schiphere sine urucht afnemen.

XV.

So we so huret ein schip, unde schepet he dar in ofte nicht, unde wil he uthschepen eir dat schip to seghele gheit: he scal gheuen halue urucht. Seghelet auer dat schip III mile weghes to der she wart, he scal gheuen vůlle vrucht.

XVI.

So welc man selue sin schip schepet, de ne ghift nen windeghelt.

So we so huret ein schip, de ghift windeghelt:

Van eneme hundert kornes ghift men in unde uth to schepende II sol. englis, unde to kolende I sol.

Van der last wasses IIII penninghe englis.

Van der last coperes, tenes unde blies III penninghe engles.

Van eneme hundert sparren uan uertich uoten VII sol. englis. Van XXIIII uote sparren II sol. englis.

Van stenderen, dhe beneden XX uote lanc sin, III sol. englis, unde dhe bouen XXII uote sin, IIII sol. englis.

Van eneme cocghen brede XL uote lanc enen hamborgheren penning in, unde uth enen ulameschen. Is id L uote lanc, men ghif dar uore enen englischen penning.

Van eneme hundert remen bouen XX uote ghift men VI penninghe, unde beneden XVIII uote IIII penninghe englis.

Van waghenschote, van litholte, uan stappen, dat bouen XXXV sol. is ghecoft, scal men gheuen II penninghe hamhorghere in, unde II penninghe ulamis uth; vnde is id ghecoft umme II punt ofte durere, men ghift uan dheme hunderde II penninghe englis; vnde is id beneden XXX sol. coft, id ghift enen englischen penning in unde uth.

Van eneme uate aschen uan Lewenwolde unde uan parleberghescen uate IIII penninghe, van hiddesackerschen uate III penninghe, van eneme boycenborgheren vate II penninghe.

Van eneme woltuate II penninghe englis.

Van eneme vodere uate smeres IIII penninghe.

Van eneme uate wedes III penninghe. Van ener mese wedes VI penninghe.

Van enen uate wines uan Roczeil ofte uan enen olgye uate VI penninghe; van eneme rineschen uate van XII amen I scillingh englisch in vnde vt enen schilling.

Van eneme uoder pekes IIII penninghe englis, englisch in vnde vt. Van enen vate aschen van Blekede II pennninghe englisch in vnde vt.

Van enen kanenblocke XVIII penninghe.

Van eneme hunderde knarholtes, dat XXIIII uote lanc is ofte dar bouen, II schillinghe, unde beneden XX uote enen scilling; van twen hunderden seuen uote holtes ofte vif uote enen penning.

Vnde van twen hundert molden also, unde van III hunderden meleuate enen penning.

Van stenderen XIIII uote lanc XVIII penninghe.

Van VI vighencoruen enen penning.

Van III mandelsacken enen penning.

Van twen waghen ulocken enen penning.

Van der tere wandes III hellinghe.

Unde al is id bi englischen ghelde gheseghet.

So wat in unde uth gheschepet wert mit des schipheren touwe, des windegheldes scal he hebben den dridden deil.

XVII.

So welc man sin schip uerhuret to Uttrecht, de scal gheuen iewelkeme schipmanne XII sol. to der uart, se si cort ofte lanc. Dhe schipmanne sin och schuldich to licghende to Marsen [Dorf bei Utrecht] na ereme schipheren XIIII nacht; unde beureset se binnen der tit, de schiphere ne ghift en nene bate. War is dat water open, unde wil de schiphere wachten na urucht, unde leghet he bouen ere tit, he scal en gheuen to der weken XVIII penninghe [uth]trechtis, oder dhe cost; unde dat steit an des schipheren willen, welcere he en gheuen wille. Vnde so wan so de schiphere seghelen wil, so scolen se rede wesen, unde mit eme uaren. Unde beurore dat schip underweghen, se scolden sin nene wis uertien eir se dat schip to hus brechten. Unde untbrake en spise unde ghelt, de sciphere scal en ghelt lenen, unde dat scolen se ghelden also dat schip to hus komet. Vnde ne wil he des nicht doen, so moten se wol eme unfaren.

Vntgheit och ein knape sineme heren mit moetwillen, he scal eme wederkeren al sin lon, dat he uan eme untfink.

XVIII.

So wan so ein man sin schip silue ladet to Uthtrecht, al dhe wile dat men in schepet ofte uth schepet scal he dhe knapen becosteghen.

XIX.

Seghelet ein man to Stade, to ladende to Uttrecht wart: he scal iewelkeme knapen gheuen to bate enen schilling hamborghere; oppe de Store [der Fluß Stör] XVIII penninghe.

XX.

So we schipbroken goet uint oppe dheme uorende, de scal dar af hebben den twintighesten deil; de id halet oppe dheme reue ofte in der she, de scal hebben den dridden deil. Unde drift id bi der bord uore, dar ein schip rit, unde de dat op tuht, de scal hebben den twintighesten deil.

XXI.

So welc man den anderen anseghelet oder oppe eue drift mit ungherade, so welc ereme schade dar scuht, den scal de andere half ghelden. Unde den schaden scal men bewisen; unde dhe anseghelinghe ofte dhe drift scal men tughen. Unde de den anderen den schaden deit, de scal sweren, dat id ane sinen danc si gheschen. Unde de andere scal sweren, wo grot sin schade si unde wat sin schip hebbe costet weder to makende.

XXII.

So wor so ein scip dor noet willen goet uthwerpet, dat schip scal mede ghelden marc markelike.

Wert mast ofte touwe ghecoruen, de schiphere heuet den schaden aleine, dar ne werde wilkore ane dan; unde den wilkore scolen tughen dhe in dheme schepe do weren.

XXIII.

So wan so ein scip gheladen is to dheme schore, unde wech seghelet ungheschuldeghet uan den uruchtluden: kumt dheme goede gicht to uan werpendes haluen, dar ne scal de schiphere nene noet umme liden.

Wert och ein schiphere beleth mit goeden luden, unde gheschuldeghet, dat sin schip si to sere laden, unde seghelet he dar bouen enwech, unde wert des goedes wat gheworpen: dat scal de schiphere aleine ghelden.

Is och ein schip to sere laden, unde scal men uthschepen. de dar lest inschepede scal erst uthschepen.

XXIIII.

So wor lude hebbet ein schip tosamene, ofte ein man den meren deil in dheme schepe: de minre scal dheme meren dele uolghen. Id ne si also, dat he mit den meren dele dat schip wolde licghen laten, unde den anderen uthdroten: des ne mach nicht sin; wante men wiset ia dat schip to watere wart.

XXV.

Hebbet compane ein schip tosamene, vnde wil erer ein uan deme anderen: so welc erer uan dheme anderen wil, de scal dat schip setten beide dach unde ghelt, unde de andere scal kesen binnen XIIII daghen; unde also scolen se scheden wesen.

XXVI.

Ein iewelc user borghere scal uoren enen roden ulugher. So we so des nicht ne deit, de scal id beteren bi III marken silueres to der stadt kore, he ne lecghe ene neder dor anghestes willen.

So welc gast och enen roden ulugher uoret, de scal gheuen also uele, wert he an useme rechte beclaghet.

XXVII.

Ein schipman de ne ghelt nicht uan siner uoringhe to werpinghe eir haluer last; war werpt men ouer halue last, so ghelt he mede wat denne worpen wert, marc markelike.

XXVIII.

So wan so ein schip tobricht, so scal de schiphere allererst berghen dhe lude, unde darna dat rede goet; unde darna moet he wol berghen sin touwe ofte he mach; unde darna scal he den uruchtluden den boet lenen, dat se ere goet mede berghen, ofte se dhene hebben willet.