BIBLIOTHECA AUGUSTANA

Heliand

Fitte LIII

______________________________________________________________________________

Heliand

Fitte LIII

Huand sô huan sô that geuuir{d}id,| that uualdand Krist,

mâri mannes sunu| mid theru maht godes,

4380

kumit mid thiu craftu| kuningo rîkeost

sittean an is sel{b}es maht| endi samod mid imu

alle thea engilos,| the thar uppa sind

hêlaga an himile,| than sculun tharod heli{d}o barn,

elitheoda kuman| alla tesamne

4385

libbeandero liudio,| sô [huat sô] io an thesumu liohte uuar{d}

firiho afôdid.| Thar he themu folke scal,

allumu mankunnie| mâri drohtin

adêlien aftar iro dâdiun.| Than skê{d}id he thea farduanan man,

thea faruuarhton uueros| an thea uuinistron hand:

4390

sô duot he ôk thea sâligon| an thea suî{d}eron half;

[grôtid] he than thea gôdun| endi im tegegnes sprikid:

«kumad gi», [qui{d}id he], «thea thar gikorene sindun,| endi antfâhad thit craftiga rîki,

[that] gôde, that [thar] gigereuuid stendid,| that thar uuar{d} gumono barnun

giuuarht fan thesaro uueroldes endie:| iu ha{b}ad geuuîhid sel{b}o

4395

fader allaro firiho barno:| gi môtun [thesaro frumono] neotan,

[geuualdon] theses [uuîdon] rîkeas,| huand gi oft mînan uuilleon [frumidun],

fulgengun mi gerno| endi uuârun mi iuuuaro ge{b}o mildie,

than ik bithuungan uuas| thurstu endi hungru,

frostu bifangan| eftho [an] feteron lag,

4400

biklemmid an karkare:| oft uur{d}un mi [kumana] tharod

helpa fan iuuun handun:| gi uuârun mi an iuuuomu hugi mildie,

uuîsodun mîn uuer{d}lico.»| Than sprikid imu eft that uuerod angegin:

«frô mîn the gôdo», que{d}at sie,| «huan uuâri thu bifangan sô,

bethuungan an sulicun thara{b}un,| sô thu fora thesaru thiod telis,

4405

mahtig mênis?| Huan gisah thi man ênig

bethuungen an sulicun thara{b}un?| Huat, thu ha{b}es allaro thiodo giuuald

iac sô samo thero mê{d}mo,| thero the io manno barn

geuunnun an thesaro uueroldi.»| Than sprikid im eft uualdand god:

«sô huat sô gi dâdun», qui{d}it he,| «an iuuues drohtines namon,

4410

gôdes fargâ{b}un| an godes êra

them mannun, the hêr minniston sindun,| [thero] nu undar thesaru menegi [standad]

endi thurh ôdmôdi| arme [uuârun]

[uueros, huand] sie mînan uuilleon [fremidun]| – sô huat sô gi im iuuuaro uuelono fargâ{b}un,

gidâdun thurh [diuri{d}a],| that antfeng iuuua drohtin sel{b}o,

4415

thiu helpe quam te he{b}encuninge.| Bethiu uuili iu the hêlago drohtin

lônon [iuuuan] gilô{b}on:| gi{b}id iuu lîf êuuig.»

Uuendid ina than uualdand| an thea uuinistron hand,

[drohtin] te them farduanun mannun,| sagad im that sie sculin thea dâd antgelden,

thea man iro [mêngiuuerk:]| «nu gi fan [mi] sculun», qui{d}it he.

4420

«faran sô forflôcane| an that fiur êuuig,

that thar gigareuuid uuar{d}| godes andsacun,

fîundo folke| be firinuuerkun,

huand gi mi ni hulpun,| than mi hunger endi thurst

[uuêgde] te uundrun| eftha ik geuuâdies lôs

4425

geng iâmermôd,| uuas mi grôtun tharf,

than ni habde ik thar ênige helpe,| than ik geheftid uuas,

an li{d}okospun bilokan,| eftha mi legar bifeng,

suâra suhti:| than ni uueldun gi mîn siokes thar

uuîson mid uuihti:| ni uuas iu uuer{d} eouuiht,

4430

that gi mîn gehugdin.| Bethiu gi an hellie sculun

tholon an thiustre.»| Than sprikid imu eft thiu thiod angegin:

«uuola uualdand god», que{d}ad sie,| «huî uuilt thu sô uui{d} thit uuerod sprekan,

mahlien uui{d} these menegi?| Huan uuas thi [io] manno tharf,

gumono gôdes?| Huat, sie it al be thînun ge{b}un [êgun],

4435

[uuelon an thesaro] uueroldi».| Than sprikid eft uualdand god:

«than gi thea armostun», qui{d}id he,| «eldibarno,

manno thea minniston| an iuuuomu môdse{b}on

heli{d}os farhugdun,| lêtun sea iu an iuuuomu hugi lê{d}e,

bedêldun sie iuuuaro diur{d}a,| than dâdun gi [iuuuana drohtin] sô sama,

4440

[giuuernidun imu] iuuuaro uuelono:| bethiu ni uuili iu uualdand god,

antfâhen fader [iuuua],| ac gi an that fiur sculun,

an thene diopun dô{d},| diu{b}lun thionon,