Allemannische Gedichte

Für Freunde ländlicher Natur und Sitten

1803

__________________________________________________________________________________

Freude in Ehren.

(mit einer Melodie.)

Ne G'sang in Ehre,

wer wills verwehre?

Singt 's Thierli nit in Hurst und Nast,

der Engel nit im Sterneglast?

e freie frohe Muth,

e gsund und fröhlich Blut

goht über Geld und Gut.

Ne Trunk in Ehre,

wer will's verwehre?

Trinkt 's Blüemli nit si Morgethau?

Trinkt nit der Vogt si Schöppli au?

Am Werchtig hemmer gschaft,

drum bringt der Rebesaft

am Sunntig neui Chraft.

[30]

Ne Chuß in Ehre,

wer will's verwehre?

Chüßt 's Blüemli nit si Schwesterli,

und 's Sternli chüßt si Nöchberli?

In Ehre, hani gseit,

und in der Unschuld G'leit,

mit Zucht und Sittsemkeit.

Ne freudig Stündli,

ischs nit e Fündli?

Jez hemmers und iez simmer do;

es chunnt e Zit, würds anderst goh.

's währt alles churzi Zit,

der Chilchhof isch nit wit.

Wer weiß, wer bal dört lit?

Wenn d' Glocke schalle,

wer hilftis alle?

O gebis Gott e sanfte Tod!

e rüeihig Gwisse gebis Gott,

wenn d' Sunn am Himmel lacht,

wenn alles blizt und chracht,

und in der lezte Nacht!