| |
Das Sibende Capitel.
Wie Gurgelmiltsam, als sie mit dem Kindlin
Gurgellantule schwanger gieng, einen
grossen wust Kutteln fraß, vnd
daruon genas.
GElegenheit vnd weiß, wie Gargalmelle genesen sey, ist folgender gestalt geschaffen, vnd wann jrs nicht glaubt, so entgeht euch das gantz Fundament. Das vnden am end aber entgieng jren ein stund nach mittag, den dritten des Hornungs, da eben dasselbig Jar die Faßnacht eingieng, als sie zu viel Bauntzen gegessen het, Bauntzen sind feißte Magendärm von Barrenrindern: Von diesen grossen Vberreusischen Vrochsen, die man hinder dem Baum sticht, haben sie auff Hecatombisch drey hundert, siben vnd sechtzig tausent vnd viertzehen schlagen lassen. Ja noch für ein Anhenckichts oder Anpendix doppel so viel Schwein, wie viel mögen das sein, «Millia sex legio, Sexcentum, Sex decies Sex», das such inn Gemma Gemmarum, der ist mehr dann einmahl darbei gewesen, wann man einander das Maul mit Würsteri gemessen hat.
Alles obgenent fräsig Schlachtopffer ward zur heyligen Fraßnacht eingesaltzen, vnd gleich zum eingehenden Früling wie das gold probirt. Was meint jr daß der gantz gepraten Ochs auff der Krönung zu Franckfort gegen disem sei? Wann man schon daselbs mit acht henden, mußt das Pratrad wenden, vnd der Haß mit seinen langen Ohren, sich im bauch hat verloren, vnd die Rechkeul: Kalbsschnautzen: Hirtzsput: vnd Schweinköpff herauß guckten auch das hinder virtheil mit Federwildpret, vnd den halß mit Fischen schmuckten? Was war es? Eben gegen dieser anzal zurechenen, wie der Hanna Opffer zu des König Salomons Tempelweihe. Dann er het auß seinem Käßmilbigen Hirn erst zu disem maulschmutzigen handel ein Lebendig Pratspißwerck: oder selbsgengig Pratspißmül von 72 Pratspissen erfunden: wer hett jm sonst bei zeiten kochen können: Vnd nimpt mich wunder, wa vnserer heutiger Seidenwurmiger Meyster sein Hundseidenmül her hat: Gewiß ist er vnsern Alledurstigen vnd Allegrillischen Geheimnußbullen vnd Pantarchen vber den Sack kommen, dann man stellet jnen heut so sehr nach, wie den Vbercelsischen Arslullenbüchern.
Ein solchs vnmenschlich metzigen aber, soll euch nicht wunder nemmen, dann was Griechischer Köpff gibt es, wann der vnsinnig Aiax vnter das vihe geraht: andere zeit, zeugen auch ander Leut: damals mußt es alles auff Gargroßgrandgeidisch zugehen: dann wa Weibergelüst fallen ein, da muß nichts zu theur sein.
Ach jr glaubt nicht, wie tröstliche Schlafftrünck es pringt, wann man dermassen auß der feißten Kuchen aufftringt, als wann man holtz zur saltzpfannen fürt. Wie stehet es so wol, wann ein jdes Platteiselengesäß, vnd Alantischer ruckenkrebs ein sondern stul einnimpt: habt jr nicht die feißt andacht gemalet gesehen, da die schmutzkolbige Buben vnnd trieffnasige Würstfüllstopper so sautrogisch mit beiden tapen inn der Pratpfann ligen, da man den Bachenspeck mit Ferckensschwentzlin herab wirft, da der Herr Be er o Probst mit eim waschengill voll Wein das Weinwasser gibt: Ha, ha: da gehts volle wol: da hetzt man den Lazarmen, Latzleren, außgedörrten, rauchgehenckten bickingischen Schneckenfresser vnd haffenscharrer Bruder Lantzenstil sampt seiner lären Sackpfeiffen mit kröpfigen hunden auß, daß dem armen schwantz vor feißtem schrecken möcht das pruch entfallen: dann armut schneid da kein Speck, aber jene suchen äl inn eim jeden treck. Dem Herrn Raumauff vnd den Barrenhengsten ist die weid gewachssen, die Ackermerren mögens wol mit dörrem rucken bawen vnnd Haberstro fressen: man machts diß Jar keim anders, «En quêis conseuimus agros»?
Darumb hat vnser Großpruchier so viel Würst gemacht: da waren vollauff Kuttelfleck, Kopff vnd Kröß, Vtter, Gehenck sampt den Netzen vnd Börsel, Tribdärm, treibwürst, Sultzwammen, Saltziß: Bononische Tucedenwürst, Lucanisch Mettwürst, Bülling: Burgundisch Allandrillewürst: Langenitzische Botullenbüdin: Rollpansen, eingemacht Hauben vnd Bücher, versultzt manigfalt: magenfett: Bautzendärm: Würstbuntzen: Pluthund, Weckerlin, Fleischdärm, eingehacktes vnnd allerley Küdreckottfleisch, vnnd dasselb also leckerhafft, das jeder die tappende tapen vnd Zähen darnach lecket.
Aber des genäsches war nur zu viel für vier Personen, also das es vnmöglich war lang zu halten, dann es wer ob einander erfaulet vnnd erstuncken, wie der Papirer Lumpen, welchs sich nicht gebüren wolt. Derwegen ward beschlossen, auff daß der Plunder nicht vnnützlich verdirb, vnnd auß dem weg kem, den Rucken darhinder zuthun, vnnd es weydlich, vnd neydlich auffzureiben. Hiezu worden durch das Orlandisch greuelhorn auffgemanet die Schlegel Leuten Leut vnnd wangenlanggeübte Kunden auß dem Trettacher, Iler, Irracher vnd Breytacherthal, Eßfeld, Eßlam, Eßlingen, Darmstatt, Lebersweiler, Arsfeld, zum Gefräß, die von Langenwangen, Langweyd, Hindenlangen, Langenlumpen, Sibenwürst, Saurmund, Bautzen, Küchel, im Gewäng, Gemündt, Bömischem Brot, Schmärmeusel, Langenzän, Elwangen, Kolwangen, Honigspittel, Wangenstantz, Haltenwangen, Nesselwangen, Eyterwangen, die zu der kalten Herberg, zu der Fetten Hennen, zur Anricht: Welche auch die von Ißne, Füssen, Geckingen, Mundelheim vnnd andere Gurgelschmirer mitprachten: Vnnd solche erschienen alle von wegen Wolffmägiger Brotmeyerei. Aber von wegen Weinschlauchitet vnnd Birpausitet worden mit der Sturmglocken zusamen gelitten, sonst machtloß gut gesellen, die von Bachi rach, von Wachbach, Bachern, von Koburg, Bamberg, Rube aqua, Wartwineler, Hebwineler, Gebwineler, Neuwineler, Schleckstatt, Weinfelden, Ketwein, Weinam, Weinmar, Glettwin, Krügel, Schadwin, Kitziwin, Lamenhand, Sedelbach, Feucht, Weichmichel, Merding, Buntzel, Dinckelspül, Daubsal, Kandstatt, Treckshausen, Hopfica, Springlingen, Kelberbach, Eselbach, Herbsthausen, Haslach, Rebenmund, Haubenweißheit, die zum Bauren, zur Frawen, zum Geuatter, zur Höll: Vnd sonst Sanct Vrbans Jünger vmb Ensheim, vnd Ritter des ordens von S. Otmars Lägeleflüß, vnd was das Glas heben vnd geben, wenden vnnd legen, halten vnd pringen kont, experte vnd diserte auff guterruff rencken, vnd angster schwencken.
Der gut Mann Grandgusinger het sein hertzliche freud damit, wann er also guthertzig sah die Platten raumen, vnd die Becher schaumen, die «spumantes pateras»: vnd that nichts anders, als dz er sie auffmunteret, nicht in der predig zuentschlaffen: frisch auff jr Gesellen, die Hüner praten schon, trincken wir Wein, so beschert Gott Wein, seit frölich bei den Leuten, vnd wer hie will ein hadermann sein, der mach sich weit von Leuten, vnd fahr in Wald nach scheuten.
Jedoch warnet er sein Gemal, als einer der für den schwachen Werckzeug sorget, daß sie sich etwas enthielte, weil sie nahe auff dem zil gienge, vnd aber diese Kuttelwescherei kein Kindbetterinhenn, Capaun oder verplutetes Täublin war. Diser, sagt er, muß gewiß grossen lust zu treck kauen tragen, der auch den Sack dauon frißt, vnd noch an zipffeln will nagen. Gleichwol sie, nach art des widerstramigen zeugs, von gelüsten vberwunden, ase der Kutteln vnd pfutteln sechtzehen Seiffkessel, zwen Amen, sechs Nossel, zwo Schauffel vnnd zwo Bollen voll. O schöne Fecalische materi vnnd Trusenmüßlein, schöne Krebsmüßlin, vnd gebachen Haselstaudenkätzlin, welchs sie lustig darmwinden, Kißlinflötzen, vnnd zur Wassersüchtigen sackpfeiffen auffplehen kont, das reitzt vnd trib die geburt, da ward jr plau vor den augen, das hinderst theyl des hals warm, der ruckgrad kalt, einsmals rotprecht, vnd darauß man das zukünfftig Fülle mocht erprofeceien, so setzt sie den rechten fuß für, vnd was jr die recht seit vnd Prust spitziger als die linck.
Nach dem Mittag anbiß, da man genug Kutteln geweschen hat, zog die obgedacht erfordert gesellschafft hauffenweiß ordenlich, wie die Säu zum Thor einlauffen, hinauß vnder die Linden, bei die Weidenbäum, vnnd Wilgenbusch, da dantzten, schupfften, hupfften, lupfften, sprungen, sungen, huncken, reyeten, schreieten, schwangen, rangen: plöchelten: füßklöpffeten: gumpeten: plumpeten: rammelten: hammelten, voltirten: Branlirten, gambadirten, Cinqpassirten: Capricollirten: gauckelten, redleten, bürtzleten, balleten, jauchtzeten, gigageten, armglocketen, hendruderten, armlaufeten, warmschnaufeten (ich schnauff auch schier) nach den lustigen Schalmeyen, seyffelen: Pfeiffenbeuckelen, hend vnd maul, Lullepfeiffen, Schwegeln: maultrummen: schnurren, Säutröglein, Ruspfeiffen, vnnd anderm kunstreichen Sackpfeiffengeschlecht, das es für Herrn ein Narrenlust gab zusehen, wann sie sich also wacker auff eim fuß herumb wurffen vnd dummelten, wie ein bleiens Vögelin das heißt Kü, vnd so Hurnausenstürmig vnd Brämenschwirmig wie die Beckerbuben auff der Tantzlauben vnd dem Fechtboden: O weit von dannen jr Hofdäntz: Es ist einmal gut, daß jr etwas guts zu Hof habt, welches die hoflebenschender nit schelten mögen: auch jhr Nörnbergisch Geschlechterdäntz, die kein herumbspänleinn leiden können: Hie ist ein ander Tantzschul, auch ein anderer Schweitzerischer Buffe, der mit einer Elenlanghandhabigen Fochtel vnnd mit außgestrecktem Contractem vngebogenen Arm daher vordantzet, oder vortritt: Hie gilts den Scharrer, den Zäuner, den Kotzendantz, den Moriscen, den schwartzen Knaben, der gern das braun Meidlein wolt haben, Ja haben, wann mans jhm geb. Nun Meidlin fort, dran, sprungsweiß an Spiß, wie ein jungs Wild im Spißhart. Seh, seh, mein leydiger kund, wie schöne hochauff hebende, langschreitende Storckenbeyn zum dantzen.
|