49

Von der dritten Fasnacht
am Ascher Mitwoch:

Am Ascher Mitwoch der Rechten Fasnacht kamen Die Studenten als berueffne Gässt Da Er jnen ein Herrliches Mahl gab / vnnd also sprangen / sungen/ vnnd alle kurtzweil triben /

Als nun die Hochen Becher vnnd glesser herumber giengen / Da hebt Doctor Faustus an sein Gaugkelwerckh zutreiben / Dann Sie hörten jnn der Stuben allerlay liebliche Saydten spil / vnnd wusten doch nit wo es herkeme / bald ein spiel aufhöret / kam ein anders / Da ain Orgell/ Positif / Lautten Geigen / Cittern / Harpffen / Krumhörner / Posaunen / schwegel / zwerchpfeiffen / Jnn Summa es waren allerlay jnstrument Da / jnn dem hueben an Die Gleser vnd Becher zu hupffen /

So nam Doctor Faustus Ein hafen oder zehen / Die stellet Er jnn die stubñ / Da hueben sie an alle zu Dantzen / vnnd Einander zu stossen / Das sie all einander erschmetterten / Welchs ein gross gelechter am Tisch gab.

Bald hernach hebt Doctor Faustus ein ander kurtzweil am Tisch an / Ließ ain Gegkler jnn einem hof fanngen / den stelt Er auf den Tisch / als Er jm nun zudrinckhen gab/ hueb Er natturlichen Mit dem Schnabel an Dantz zupfeiffen.

Bald macht Er wider ein kurtzweil / Satzt ein jnstrument auf den Tisch / Da kam ein Alter Aaf jnn die Stuben / vnnd macht vil Schöner Tantz jnn die stuben Darauff/

Als Er nun solche kurtzweil trib biß die Nacht Daher gieng / Batt Er die Studenten Sie wöllen vollendts Da bleiben / vnnd mit jm zu Nacht Essen/ Er wolt jnen Ein Essen vogel geben / Dann wolle Er mit jnen jnn die Mumerey gehn / welliches Sie jm leichtlichen zuesagten/

Also nam Doctor Faustus ein Stanngen / Die raicht Er fur das Fenster hinauß/ Da kamen allerley Vogell zu seinem Fenster / vnnd welliche vff Die stangen sassen / Die kondten nit mehr Weitter / Da Er ein Summa Vögel fieng / Die Studenten halfen jm alle vögel wurgen vnnd ropffen / Dann es waren Lerchen / Cramater / Vnnd Vier Wilde Endten /

Als Sie nun dapffer gezecht hetten / sein Sie mit einander jnn die Mumerey ganngen / Doctor Faustus beualch zuuor / Das ein jeder ein weiss hembdt solt anthuen / vnnd jn machen lassñ / sollichs geschach / Da nun die Studenten einander ansahen/ Daucht ein jegclichen Er hette keinen köpff / Mit solcher Mumerey giengen Sie jnn ettliche heuser / Darab die Leuth erschrackhen / Als aber die Herren bey denen Sie das kuechlin geholt sich zu Tisch gesetzt / Da hetten Sie jren schein wider / vnnd kent man sie darauff alsbald. Schnell verenderten sie sich wider vnnd hetten Natturliche Eselsköpff vnnd Ohren / Das triben Sie biß jnn die Mitternacht hinein vnnd zoch ein jeder widerumb zu Hauß/