Unterweisung der Messung

mit dem Zirkel und Richtscheit

1525

Bauernsäule

Quelle:

Albrecht Dürer, Unterweisung der Messung

mit dem Zirkel und Richtscheit,

Nürnberg 1525

Digitale Version: Irmgard Bock

Faksimile: Bayerische Staatsbibliothek

______________________________________________________________________________

Welicher ein victoria auf richten wolt / darumb das er die aufrürischen bauren vberwunden het / der möcht sich eins solichen gezeugs darzů gebrauchen / wie jch hernach leren wil.

Erstlich setz ein gefierten stein zehen schuch ein seyten lang vnnd vier schuch hoch / der ste noch auf einer gefierten blatten zweyntzig schuch ein seyten lang vnnd eyns hoch / vnnd auf einen bühel [Hügel] / auf die vier örter [Ecken] leg gebunden küe / schaff / schwein vnnd allerley. Aber auf den öberen gefierten stein setz vier körb auf die vier ort mit kes / butter / ayer / zwiffel vnd kreuter oder was dir zůfelt. Darnach leg noch mitten auf disen stein ein anderen gefierten stein ein seiten siben schuch lang vnnd eynes schuchs hoch / mitten auf disen stein setz ein haber kasten vier schuch hoch vnden ein seiten sechs schuch vnd ein halben lang aber oben bey dem schlos sechs schuch lang / vnd zů oberst auf der deck 4 schuch lang darauf stürtz ein kessel vierdhalben schuch weit / aber im boden nůn drey schuch / mitten auf des kessels boden setz ein kesnapf eyns halben schuchs hoch / oben zweyer schuch weyt / aber am boden nit mer dann anderhalben / den deck zů mit einem dicken teller das wol vberschies / mitten auf das teller setz ein butterfas drey schuch hoch / vnden am boden anderhalben schuchs breyt / aber oben nůr eines schuchs weyt / doch die schnaupen darauß man geust soll fürtreffen / mitten auf dis butterfas / setz ein wolgeschickten milich krug drythalben schuchs hoch / im bauch eyns schuchs weyt / aber oben eins halben / aber den füs mach vndenn weyter / vnnd im milich krug richt auf vier scharren / damit man das kot zůsamen raspt / die zeuch vber sich fünf schuch vnd eyn halben / darumm pind ein garben fünf schuch hoch / also das die scharren ein halben fürtreffen / vnd henck daran der baweren werckzeug hawen / schauflen / hacken / mistgabel / trischenflegel vnd der gleychen / darnach setz zů öberst auf die scharren ein hüner körble vnd stürtz darauf ein schmaltzhafen / vnd setz ein trauretten bauren darauf / der mit einem schwert durch stochen sey. Wie jch das hernach hab aufgerissen.