EJn gůter frummer mensch begeret von unserm herren dz er im kunt thett warjnnen er sich sölt üben / darjnn er im ein wolgefallen thett. Jm ward geantwurt. wilt du got ein besunders wolgefallen tůn / so gib einen pfening hie in diser zeÿt durch gotes willen so du es wol getůn magst / und dÿe weil es dein ist / dz ist mir lieber und dir nüczer / denn ob man nach deinem tod geb eÿnen grossen hauffen. ¶ Dz ander weine einen zeher waßers umb dein sünd. und umb meines leidens willen / dz ist mir lieber und dir nüczer denn dz du als vil růten auf deinen ruck er schlügest als auf einen weiten veld gewachssen möcht [156v] ¶ Dz dritt ist. leid ein verschmechtes hertes wort durch meinen willen / das ist mir lieber und dir nüczer. denn das du einen See vol wassers waÿntest umb zergencklich zeÿtlich ding. ¶ Das vierd. Prich deinen schlaff ab durch meinen willen / dz ist mir lieber und dir nüczer / denn das du schicktest zwelff ritter nach deinem tod zů dem heiligen grab. ¶ Dz fünfft ist beherberg den armen menschen und thů im gütlich durch meinen willen / dz ist mir lieber und dir nüczer denn dz du vÿerczig iar in ÿegklicher wochen dreÿ tag vastest mit wasser und prot. ¶ Das sechst ist. rede nÿemant übel und argkwan nicht / dz ist mir lieber und dir nüczer denn dz du die ganczen welt umbgiengest / und in ÿegklichen fůßtrit dein plůt verrertest. ¶ Dz sibent ist / Ker alle ding zů dem pesten und erger nichcz. das ist mir lieber und dir nüczer denn [157r] das du alle tag in den dritten himel verzuckt würdest. ¶ Das achtent ist / warumb du pittent pist / es seÿ umb leÿb umb sele umb gůt oder umb ere / so pit mich selb / dz ist mir lieber und dir nüczer denn das mein liebe můter und alle heiligen und engel für dich petten. noch wil ich dein rein andechtig gepet lieber erhören. ¶ Das neünd ist. hab mich lieb für alle lieb / das ist mir lieber und dir nüczer / denn das du ein saul aufgiengest die überal vor scharsach stecket. und dÿe da reÿchet von dem ertreÿch piß an die wolcken / und teglich dein plůt daran vergüssest und versertest. Noch ist mir lieber das du mich lieb habest über alle lieb ¶ Unser lieber herre spricht mer zů dem menschen. Lob mich in deiner getreüen arbeit so würt dein arbeit mein lob. und hab mich lieb in deiner widerwertikeÿt / so würt dein lieb mich ziern [157v] Gee mir nach in stettikeÿt so würt dein sel mein gefert. Sanctus Bernhardus spricht so der mensch ÿe grösser sündet so im got ÿe gütlicher nachgeet. ¶ Sanctus Augustinus spricht. Hab got lieb von ganczen deinem herczen oder du verdienst den ewigen schmerczen. ¶ Sanctus Paulus der spricht Kein mensch ist got als wolgefellig als der der frid in seinem herczen tregt. wann der zorn ist der natur / wenn man in übet so er ÿe mer wachsset / und enzündet sich im herczen zů untugenden. und erleschet alle tugent. Wer oren hab zů hören der höre.