Das lob der frawen.

     DIe wirde vnd ůbertreffen der frawen zuloben, darzu ich in ſunderheit geneigt bin, will mir ſein ein ſchwere půrd; doch ſo vil ich weis vnd vermag, will ich das volfůren vnd des erſten fůr mich nemen das lobe, das do kumpt auß weißheit, auß kůnſten vnd geſchriften der frawen, Wann wir leſen, das nichtz grỏſers, nichtz wirdigers vnd nichtz [39b] nůczers dem menſchlichen geſchlecht dann kunſt der geſchrifft geben iſt. durch die kunſt werd wir vndterweiſt gen vnns vnd anderen recht zuthun, ein gemeinen nutz zufůrdern vnd ein andechtigs, ſeligs leben zufůren; vnd mag keiner recht weýs geſein, der ſollicher kunſt der geſchriffte vnkůndig vnd lere iſt: Wann derſelbig irret, wirt betrogen vnnd fellet gar leicht in deinen dingen, das nichts mer widerwerttig eim weýſen man geſein mag. So iſt das ỏffenlich, das alle erkanntnuß gỏtlicher vnd menſchlicher dingen vnd alle weýßheit in der kunſt der geſchrifft iſt begriffen. Sỏllicher geſchrifft nutz vnd gebrauch wer hat vns geỏffnet, wer iſt ir ein erfinder vnd lerer geweſt? das ſein geweſen die frawen. Iſis, die fraw, hat nit allein die erſten buchſtaben in egýpten, ſünder auch, wie das erttrich zupawen ſeý, vnd den gebrauch des flachs erfunden. So hat Nicoſtrata, die auch Carmentis geheißen iſt, die lateiniſchen buchſtaben erfunden vnd dieſelben zuſammen fůgen gelert. Saphos hat manich puch der poetreý geſatzt, die die kriechen durch ir ſunder außſprechen, wolreden vnd kunſt in eren haben vnnd behalten. Cornelia hat vil lateiniſch brieff vnd Epiſtole geticht vnd geſchriben, die nach irem tode gebraucht worden ſein. Aſpaſia iſt vaſt ein gelerte vnd wolredende fraw geweſt, alſo, das ſich Socrates nit geſchamet hat, etlich kunſt von ir zulernen. So hat Centona vil geſchrifft aus dem poeten virgilio auff die alten vnd neůen ee vnd auff das lob gotes gefůret vnd gewendet. Ameſia, die do ein menlichen mut gehabt hat, Gaia afrania, Calphurnia vnd Tanaquill haben vor den gewaltigen zu Rome in vnd außwendig der gericht geredet vnd gehandelt vnd manchen von ſchulde vnd vnſchulden erledigt. Augeriona hat in der kunſt der heýlſamen ertzneý [40a] manchem ſeinen geſundt widergeben vnd von den pannden des tods erlỏſet. Ceres, do die menſchen auß hertten aýcheln ſam das vihe ire leibnarung nomen, hat erfunden, das erttrich zupawen, die frůcht zuſammen bringen, koren zumalen vnd prott zupachen. So hat Minerua gefunden, die wollen zugeprauchen vnd zuweben, die zale vnd der zale figur, das ỏle, die wegen vnd ordnung der ſtreit. darumb ſein dieſelben vnd ander frawen durch ire kunſt, weýßheit vnd tugent zu denſelben zeitten nach gewonheit der haiden in der zale der gỏttin geeret vnd gehalten worden. Sibille, der do zwelff geweſt ſein, haben durch ir gỏtliche weýßheit die zukunfft vnſers herren Chriſti, ſein gepurt von der iunckfrawen Maria, ſein leiden, ſein tod vnd ſein vrſtende mit andern artickeln des heilligen glawben geweýſſagt vnd geỏffnet. Der frawen zu vnſeren zeiten kunſt, weýßheit vnd tugende iſt nit not zu erzelen, wann ſie ſich ſelbeſt in allen landen teglich erzaigen; doch zu ere vnd lobe teůtſcher zungen will ich hýe beſtýmmen die irleuchtige vnd hochgeborne fůrſtin, frawen Barbara, Marggrauin zu Montua, geboren von Brandemburg, die vierer zungen ſprach gelert vnd gewaltig iſt zureden, als teůtſcher, irer můterlicher zungen, welhiſcher, lateiniſcher vnd kriechiſcher, vnd iſt auch gelert der poeten vnd natůrlichen meiſtern geſchrifft, die ſie durch ir groß ſýnne vnd weýßheit hat erlanget, dardurch ſie billich vnd mer ander ir tugendt, damit ſie got begabet hat, nit genug gelobt mag werden. Die frawen můgen auch gelobt werden durch die keůſcheit, durch die lieb vnd getreů gen iren mannen, durch die gůtigkeit, miltigkeit, durch die ſtercke vnd großmůtigkeit vnd durch ander tugenden, vnd mỏcht das alles angezaigt werden durch exempel; das will ich hie vnterwegen laßen, wann es oben des merern [40b] teýles außgefůrt iſt, vnd will fůr mich nemen das dritte vnd letzte teýl diſer materi.