Consilium de ptisi

Cappittel 1

____________________________________________________________

Cappittel vom lufft.

Ir lufft sye mittel in werme vnd kelte, ursach wan warmer derret sye zu vast, vnd kalter schadet der sere der prust glider. Sol auch truckern syn ze widerstand deß geschwares vnd nit fucht. Also inder stuben sol sy suchen einen sundrichen ort do solicher lufft mittel gefunden wirt. Zwavr wo nit forcht wer übriger fiebriger hitz, so mochte sie wol dem offen etwaz nachen, wan der warm lufft vom offen ist gut der fe[b]ri. Nun fiebrikait vnd abterrung deß libeß schafft daß mittel lufft ze suchen ist. Jetz ist ir der lufft deß chores ze kalt vnd ze fucht; ja ich sprich daß disser chor vil frawen zu fucht ist, darvmb dan iro gar vil flussigte houpter habent, vnd groß kallen tůt der fucht lufft ym singen vil yn gezogen etc. Vast loublich ware an den chor gegen dem clouster hohe fenster ze machen, die man ze zitten offnen mochte, den chor lassen erlufften etc. der alt frowen salig han ich gar vil dar von gesagt, tuot ietz nit not. Nun wo diß frow vil singen vnd lessen mußt im chor so kumpt in sye der ietzig dufftig fucht kalt lufft, der ir uff das aller hochest schaden pringt vnd merung in irem prechen als dan die grundtmaister yn ertznie diß nemlich setzent. Galienus, ain furst untter den artzt, quinto ingenii haut sine siechen mit der glich prechen beladen geschickt in ein sundrich landt, Campanea genannt, do solicher lufft was, da den sy sich lang zit uffenhieltent vnd lebent. uß solicher ursach habent die Romer solich ir siechen ouch da hyn geschickt vnd auch yn nubia, do solicher lufft wie obstant waz. wan am lufft lidt groß vnd vil. Er pringt yn vnß vil endrung den sunst kayn ander ding tůt. deß luffteß empsige noturfft wo wir acht leben sollen so musent wir um in vnß zihen vnd er gat glich in die prust yn die lungen zu dem hertzen on mittel durch die gurtel. Nun ligt diser frowen prech in der prust dar vmb der kalt aldt fucht lufft ingezogen von stundan vnd stattig schaden pringt, das yn die har diß person liden mag ohn tolich schaden, diß text mag man wol verstan, ich lan es ouch also weliben uf ditz zit. Also sol diß frow fliegen regen, lufft vnd nebel darvmm sie einer stuben summer vnd wintter wedarf darynne sie auch wol neckende Kreutter plůmen vnd frücht halten solt gutter nacke sterket sy fast. besunder endrung ym lufft alß dan der herbst gilt, ietz kalt ietz warm, ietz trucken ietz fucht, ist ir fast schedlich. beschluß diß cappittel ist der siech halte sich des luffteß halb wie obstant.