Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

52.

Von dem meden.

Medus ist ain stain, der kümt von den landen, dâ die läut wonent, die Medi haizent, und ist ain tail grüenlot. er hât guot kreft und pœs. wan sô man in zerlæt mit ainer frawen gespünn, diu ain knäblein hât getragen, sô gibt er den plinden ir gesiht wider und benimt diu weizen mail in den augen und gibt den ir gesiht wider, die verhoft habent, daz si niht mêr sehen. er hailt auch der füez siehtum, der ze latein podagra haizt, und hailt die von iren sinnen koment in irem siehtum, die ze latein frenetici haizent. wenn aber man in zerlæzt in wazzer und in trinkt, sô macht er, daz ainem diu lungel datz dem mund stücklot auz gêt mit wüllen und mit halsprechen, und wer sein stirn mit dem wazzer wescht, den macht er plint.