Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

35.

Von dem epistuten.

Epistutes ist ain scheinent stain rôtvar. der den pei dem herzen tregt, den macht er sicher und senftigt urleug oder krieg, und twingt den häuschricken und die vogel und die schedleichen nebel und den schaurn und die pœsen wint von den erdfrüchten. und sô man in an die sumen legt, sô sträut er auz im selber feur und schein. wer den stain in ain wallendez wazzer wirft, sô vergêt der wal und dar nâch wirt daz wazzer kalt.