Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

29.

Von dem drachenstain.

Dracontides haizet ain drachenstain. den nimt man auz ains drachen hirn, und zeuht man in niht auz ains lebendigen drachen hirn, sô ist er niht edel. die küenen man sleichent über die drachen dâ si ligent und slahent in daz hirn enzwai, und die weil si zabelnt, sô ziehent si die stain her auz. man spricht, der stain sei guot für diu vergiftigen tier und widerstê der vergift krefticleich. die stain sint durchläuhtent und durchsihtig, und habent si die künig gern in den landen gegen der sunnen aufganch.