Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

20.

Von dem crysolecter.

Crysolectrus ist ain stain, der ist goltvar und ist des morgens ze mettenzeit frœleicherr varb dann ander zeit. ez ist auch ainerlai der stain, die niht sô lieht sint sam die êrsten, wan si sint tunkel, niht durchläuhtent, und sint gold gar geleich. der stain hât die art, daz er der stirn und der augen smerzen senftigt, die in von haizen sachen koment, und senftigt auch der fiber hitz, wenn man in in der hant tregt. wenn man in ze pulver stœzt, sô ist er guot für die schebichait und für die swern. noch ist ain dritten lai der stain, der hât ain mittelvarb zwischen gel und rôt, und wenn man den zuo ainem feur habt, sô zepricht er zehant und springt von dem feur, als ob man in jag. der stain ist den zerplæten gelidern guot und ist auch guot wider die plerchen, die under des menschen vel auf diezent.