Buch der Natur

VI. VON DEN EDELN STAINEN

UND DES ÊRSTEN IN AINER GEMAIN.

_____________________________________________________________________

6.

Von dem allectori.

Allectorius ist ain stain an der grœz sam ain pôn und geleicht sich ainer cristallen an der varb, ân daz er mêr tunkel ist. der stain wechst in ains hanen magen wenn man in kappaunt nâch drein jâren und læt in dar nâch sehs jâr leben. wer den stain in dem mund tregt, dem lescht er den durst. er macht den menschen sighaft und pringt vrid und widerpringt êr und macht wolgespræch und macht den menschen gnæm allen läuten und allermaist macht er die frawen liep iren mannen und dar umb haizt er ze latein allectorius, daz spricht ain zuozämer, und daz er daz allez würke an dem menschen, schol man in tragen beslozzen in dem mund.