Buch der Natur

V. VON DEN KRÄUTERN

IN AINER GEMAIN.

___________________________________________________

80.

Von dem linsat.

Semen lini haizet linsât. der sâm ist der art, daz er nâhen geleich tregt zwischen fäuht und trucken an der kraft und hât die art, daz er abwescht und zeitigt und zerplæt und senftigt die smerzen, iedoch minner wan die gamillen. er waicht und senftigt die inwendigen geswern und die auzwendigen und wert dem krampf und wert auch den runzeln an den vingernegeln, wenn man in mischt mit wazzer und mit honig. aber er ist dem magen schad.