Buch der Natur

V. VON DEN KRÄUTERN

IN AINER GEMAIN.

___________________________________________________

77.

Von dem mäuszwival.

Squilla haizt mäuszwival, dar umb, daz daz kraut die mäus tœtet. des krautes pleter sint gestalt sam diu liligenpleter und ist ainerlai des krautes, daz ist vergiftig und tœtleich, und wânten etleich, ez wær napelnkraut, aber daz ist niht wâr und dar umb ist daz puoch valsch, daz ze latein hât cepa maris, daz spricht merzwival, ez schol sprechen cepa muris, daz spricht mäuszwival, sam ich vor gesprochen hân. ez ist auch ainer andern lai des krautes, daz ist guot und smeckt wol und ist an der kraft haiz und trucken, daz benimt dem mund seinen gestank und wer ez izzt, dem macht ez daz gesicht scharpf und ist guot für die wazzersuht und für die gelsuht und pringt daz harmwazzer und der frawen haimleichait und macht abpurt in den swangern frawen, alsô daz si der kindel ê der zeit genesent. ez spricht ain zaubrær, wer daz kraut hæch über die tür an dem haus, dâ wer ez den vergiftigen tiern iren einganch.