Buch der Natur

V. VON DEN KRÄUTERN

IN AINER GEMAIN.

___________________________________________________

55.

Von der roten kornpluom.

Nigella haizt rôteu kornpluom. daz ist ain erkantz kraut und wehset in dem korn und hât klaineu pleter und ainen langen stengel, der ist grüen und rauch und hât ain rôte pluomen und ist sein sâm swarz. daz kraut ist an kraft haiz und trucken und entsleuzt die wind und daz plæen in dem leib und benimpt plaich varb. ez entsleuzt auch und swentet die herten apostem, wenn man ez mit ezzeich tempert, und sô man ez mit ezzeich seudet und der munt dâ mit wescht, daz benimt den zantsmerzen. ez sprechent auch etleich wollenweber, daz ez daz wullein tuoch gar weiz rainig.