Buch der Natur

IV. VON DEN PAUMEN.

B. VON DEN

WOLSMECKENDEN

PAUMEN.

___________________________________________________

11.

Von dem wolsmeckenden halm.

Calamus aromaticus haizt der wolsmeckend halm und haizt nâch aim gemainen halm, wan dem ist er geleich. der halm ist ain staud und wechset in dem land India. Platearius spricht, der edel halm ist haiz und trucken und ist an der varb weizlot und smeckt gar wol und ist inwendig hol. er hât die art, daz er kreftigt von dem adel seins smackes. er ist auch ain guot erznei wider des magen siehtum, der von kalter sach kümt, und ist dem gederm guot und hilft wider die wind, die den leib plæent, wenn man sein saf mit wermuotsaf mischt und wein dar zuo tuot. wer daz kochen in dem magen well sterken, der nem sein pulver mit cinamomspulver, und daz ist auch guot zuo der prust.