Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

D. VON DEN VISCHEN.

___________________________________________________

27.

Von dem mersnecken.

Testudo haizt ain snek, dar umb, sam Isidorus spricht, daz er mit ainr schaln bedecket ist, als er in ainem häusel sitz, wan testa ze latein haizt ain schal ze däutsch; dannen kümt daz wort testudo. ez sint vierlai sneken. die êrsten sint lantsneken, die auf dem land wonent, in den gärten und in den wälden. die andern sint mersneken, die in dem mer wonent und von den wir vor gesaget haben. die dritten sint ûfersneken, die an dem ûfer und an dem gestat ligent in der faulen erden und in den pfüeln oder in den lachen, dâ faulz ertreich ist. die vierden sint pachsneken, die in den pächen und in den süezen wazzern wonent. etleich sprechent (aber ez ist ungeläupleich), daz diu schef træger sein in irm gang, sô die sneken zder rehten seiten dar an hangen.