Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

A. UND DES ÊRSTEN VON DEN DIU

DA GÊNT AUF ERDEN.

___________________________________________________

65.

Von dem schern.

Talpa haizt ain scher oder ain maulwerf. daz ist ain klain tierl und ist plint und swarz. daz wirt von fäuhter horwiger erden, sam etleich sprechent, und diu erd ist faul. ez wont auch neur in der erden sam pilleich ist und lebt der würm ezzen in der erden, daz ist faulz ertreich. ez gêt oft auz der erden, wenn ez der durst hitzet, sô kan ez niht wider komen, wan ez gesiht niht. wenne man den schern prennet ze pulver und sprenget in mit aim weizen ains ais auf des siechen antlütz, daz ist guot für den auzsetzel. wer sein pluot streicht an die stat, dâ ainz enplœzt ist seins hârs, sô wehst im daz hâr wider.