Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

A. UND DES ÊRSTEN VON DEN DIU

DA GÊNT AUF ERDEN.

___________________________________________________

60.

Von dem eltes.

Putorius haizt ain eltes oder ain iltis und ist gar ain sêr stinkend tier, allermaist wenne ez zürnt. daz hât kürzereu füezel an der lenken seiten wan an der rehten, sam ain dahs. ez begert gar sêr der hüenr und irr aier und lebt allain des selben flaisches. ez wont auch gern pei den häusern. alsô ist ain ander tier, daz ze däutsch mader haizt, daz hât vil nâhent die selben art, ân daz sein palg edler ist. der mag ze latein moritor haizen oder galliceps, dar umb, daz er diu hüenr tœtt und si væht.