Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

A. UND DES ÊRSTEN VON DEN DIU

DA GÊNT AUF ERDEN.

___________________________________________________

47.

Von dem locusten.

Locusta ist ain vierfüezigz tier, sam Jacobus spricht. daz ist in den landen gegen der sunnen aufganch pei dem Jordan. daz ist klain und hât ain grôzez haupt, daz ist flaischig und ezzleich. dâ von list man von sant Johansen in den êwangeli, daz er der locusten lebt. diu tier gênt scharot in ainer hert. dâ von spricht man, der locust hât kainen künig. daz mag man niht verstên von dem häwschrecken, der auch ze latein locusta haizt, wan die gênt niht scharot dan selten, ainr hupft ân den andern. Aristotiles spricht von dem locusten, daz ain weip ainen züg in irm haus von der zeit und er dann noch klain wær, und dô er gewuohs, dô vant in die fraw tragent oder swanger von im selber ân des mannes gesellschaft. dâ von ist der locust ain vierfüezigz tier, des weip tragent wirt ân den man.