Buch der Natur

I. Von dem Menschen

in seiner gemainen Natur.

___________________________________________________

45.

Von den zaichen, ob ain fraw

swanger sei oder niht.

Wir haben nu gesait von des menschen glidern, nu schüll wir ain tail sagen, wie er in die werlt kom, und von der underschait, diu ist in der muoter leib zwischen dem degenkind und dem diernkind. des êrsten scholt dû wizzen diu zaichen, dâ von man waiz, ob ain fraw swanger sei worden. der zaichen setzt Avicenna vil. daz êrst zaichen ist diu zuosât paider sâmen weibes und mannes; aber daz dunket mich ain ungewiss zaichen, wan daz oft geschiht, daz doch diu frawe niht swanger wirt. daz ander zaichen ist, daz diu wünschelruot oben trucken ist an dem haupt und daz si die muoter vast seugt. daz dritte zaichen ist daz vest besliezen des mundes an der muoter, wan der munt wirt sô vast beslozzen, daz ain nâdelspitz niht dar ein möchte. daz vierd ist, daz sich diu muoter über sich hebt und für sich in der frawen leib. daz fünft ist, daz diu frawe den mônâtleichen fluz niht hât dar nâch und si swanger wirt. geschiht aber der fluz, daz ist gar selten. daz sehst, daz diu fraw ainen klainen smerzen zwischen dem nabeln und dem püschlein hât. daz sibend ist, daz diu frawe irn prunnen ze stunden niht wol gehaben mag; doch ist daz niht allen frawen. daz aht ist an etleichen frawen dar nâch und si swanger werdent, daz si der manne geselschaft hazzent oder ir haimlichait fliehent. daz wæn ich, daz daz wâr sei an den selben frawen in der êrsten new irs zuovâhens. daz neund zaichen ist, daz diu fraw træg wirt und swær an irm leib. daz zehend ist, daz ir ain klain wüllet. daz ainleft ist, daz etleich frawen köppelnt, und daz köppeln ezzicht in der keln. daz zwelft ist, daz der frawen diu haut kräuzelt und daz ir swindelt in dem haupt. daz dreizehend zaichen ist, daz etleicher frawen diu augen vinster werdent und tief. daz vierzehend ist, daz diu frawe nâch ainem mônât oder nâch zwain pœs gelust hât. daz fünfzehend ist, daz daz weiz in den augen plaichet und gelbet. Daz sint diu zaichen, diu Avicenna setzt.