bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Konrad von Würzburg

um 1225 - 1287

	Der Trojanerkrieg Der Raub der Helena Die List des Paris. Die Entführung. Rückkehr nach Troja. Die Hochzeit. Die Klage der Cassandra. 22375 - 23370
__________________________________________________________________________________
22375	Hie mite was diu rede hin, die si dâ triben under in von ir zweiger dinge. dem werden jungelinge tet der schœnen minne wê.
22380	daz er mit ir niht solte mê teidingen unde kôsen, daz mahte in sigelôsen an lieber zuoversihte. dar under von geschihte
22385	wart daz spengelîn enthaft, daz mit sînes dornes craft beslôz Helênen houbetloch dâ von kam er in swære doch unde in bitter ungemach;
22390	wan dô der jungelinc ersach ir kelen und ir blôze hût, dô wart geverwet über lût sîn bilde alsam ein tôte gel. ir lûter und ir blankez vel
22395	geschuof, daz er ûf jâmer wiel und er in unmaht nider viel, als im geswunden wære. dar nâch der tugendebære wart mit jâmer ûf genomen,
22400	wan daz gesinde was dô komen, daz in fuorte an sîn gemach. und alzehant dô diz geschach, daz er ze creften wider kam, dô wart der ritter lobesam
22405	dar ûf gedenkend alle stunt, wie im diu state werde kunt, daz er mit sînen mannen die schœnen bræhte dannen. Er hete ir rede gemerket:
22410	des wart sîn muot gesterket an der gelustekeite sîn. diu werde süeze künigîn dâ vor gesprochen hæte, si wolte, swes er bæte,
22415	daz er si des betwünge noch. dâ von der ûz erwelte doch heinlîche wart ze râte, daz er si wolte drâte dannen zücken unde steln.
22420	den willen er begunde heln vor der vrouwen minnesam. er fuorte dâ Pollidamam an eine tougenlîche stat und hiez in heimlîch unde bat,
22425	daz er kêrte zuo der habe still unde tougenlichen abe, dâ sîne ritter wæren, und er die tugentbæren geswinde kumen hieze.
22430	und daz er niht enlieze, in würde von im kunt getân, sô der tac begünde ûf gân, daz alle kæmen snelle und si vor dem kastelle
22435	der küneginne rîche zuo stiezen algelîche und si dâ kêrten an daz lant. ouch hiez er künden in zehant und bat in allen werden schîn,
22440	daz ir segel solte sîn wîz unde swarz geverwet wol. er solte halber als ein kol und halber als ein krîde wesen. diz wart den gesten ûz erlesen
22445	von Pârîse enboten sus, wan dô sich Menelâus schiet von dem kastelle dan, dô bant er einen segel an, der het ouch zweier hande vlîz.
22450	er was geverwet halber wîz und stuont ouch halber swarz gemâl. dâ von Pârîs dô sunder twâl hiez sînen werden liuten Pollidamam betiuten,
22455	daz si dar zuo gedæhten und einen segel bræhten, der gelîch dem segele schine, den Menelâus fuorte hine. Raub der Helena (Paris umarmt Helena im Schiff, das schwarz-weiße Segel ist gehißt) Sus wolte er mit den zeichen
22460	erlinden unde erweichen die küneginne spæhe, sô si den segel sæhe wîz unde swarz gebunden an, daz si gedæhte, daz ir man
22465	dâ kæme ân allen widerstrît und si begunde bî der zît hin zuo dem stade gâhen und in dâ wolte enpfâhen, als ez ir wol gezæme.
22470	und sô si denne kæme zuo den schiffen an daz lant, daz si dar în würd alzehant gezücket balde in roubes wîs. nû daz der hübsche Pârîs
22475	enboten hete sîner schar, daz si geswinde kæmen dar geschiffet, als ich hân geseit, dô wart diu ritterschaft bereit dar ûf mit willen und dar zuo,
22480	daz si kam des morgens fruo geriuschet und gerüeret. ein segel wart gefüeret von den gesten ûf dem sê, der schein halp wîz alsam der snê
22485	und halber swarz alsam ein brant. nû was ouch Pârîs dâ zehant gegangen zuo der künigîn. ich wæne, sprach er, frouwe mîn, der wirt, mîn herre, kume dort.
22490	vernement rehte mîniu wort! ich hân diu zeichen sîn gesehen. welt ir die wârheit selber spehen, sô kêrent an die zinnen! den segel, den er hinnen
22495	fuorte, den kius ich vür wâr. sus gie diu küniginne clâr hin an die zinnen bî der stunt. der geste segel wart ir kunt, der zweier hande lûhte:
22500	dâ von diu frouwe dûhte, daz Menelâus kæme. diu clâre und diu genæme wart in ir gemüete frô. mit Pârîse gienc si dô
22505	von dem kastelle sâzehant. hin an des wilden meres sant begunde si dô gâhen. si wolte ir man enpfâhen und willekomen heizen sîn.
22510	des wart diu glanze künigîn schier ûf gezücket und genomen, wan die kiele wâren komen bî der stunde zuo dem stade: dar umbe Helêne vil gerade
22515	gevüeret wart ze schiffe. mit einem snellen griffe ir süezer lîp von hôher art geroubet von Pârîse wart. Ouch wurden in diu schif genomen
22520	die frouwen alle, die bekomen wâren mit ir ab dem hûs. des meres unden unde ir sûs die kiele treip von dannen. Pârîs mit sînen mannen
22525	die küniginne fuorte hin. die marner heten under in guot weter unde snelle var. ê daz man würde sîn gewar, daz si gezücket hæten
22530	die clâren und die stæten, dô wâren si mit île des wâges manic mîle gestrichen und geflozzen. reht als ein pfîl geschozzen
22535	kômens' ûf ir strâze, si wolten ûz der mâze geswinde dannen gâhen, dur daz Pârîs enpfâhen begünde süezer minne lôn.
22540	ein stat geheizen Tenadôn lac vor in ûf der verte pfade, dâ stiezen balde si ze stade und îlten in daz kastel, daz grüene, blâ, rôt unde gel
22545	was von marmelsteine. eht siben mîle cleine lac diu stat von Troie, dâ si mit grôzer joie die naht belîben solten
22550	und ruowen gerne wolten nâch ir verte kumberlich. die geste nider liezen sich mit hôher wunne krefte. in wart von wirtschefte
22555	gebrâten wunder und gesoten. Pârîs der sante sîne boten geswinde gegen Troie dô und hiez dem künige Prîamô diu mære künden unde sagen,
22560	daz er wære bî den tagen mit êren kumen in daz lant und daz er hôhen prîsant mit im gevüeret hæte, wan Helenâ diu stæte
22565	diu kæme dâ mit im gezoget. des mæres wart des landes voget und alle die von Troie geil. si dûhte gar ein hôhez heil, daz si dâ solten schouwen
22570	den bluomen aller frouwen. Waz touc hie lange tegedinc? Pârîs der hübsche jungelinc ze Tenadôn hielt grôz gemach, wan daz er strengez jâmer sach
22575	an der küniginne rîch. si tet benamen dem gelîch, daz si betrüebet wære. si kunde clagende swære den gesten wol erscheinen,
22580	wan si begunde weinen und marterlîche sich gehaben. ir herze in leide was begraben unde in ungemüete gar. si want ir hende liehtgevar
22585	erbermeclichen unde sprach: owê mir hiute und iemer ach, daz ich zer welt ie wart geborn! ich armiu, wie hân ich verlorn man unde kint, êr unde guot!
22590	got riuwe, daz des meres fluot niht slant mich hiute in sînen giel, dô mich der sældelôse kiel von Kriechen truoc zuo dirre habe. war umbe bin ich komen abe
22595	des landes und der gülte mîn? dur waz sol ich verweiset sîn der manicvalten wirdikeit, der wunder was an mich geleit von küniclichem prîse?
22600	mîn lop in swacher wîse verenden sich nû schiere kan: hei, waz mîn herzelieber man nû jâmers unde leides pfliget, swenn er vür alle schande wiget
22605	daz laster, daz im ist geschehen. ich weiz wol, daz er wirt gesehen an fröuden gar ze tôde wunt. beswæret ûf der sêle grunt wirt er von mîner hinevart.
22610	owê, daz ich ie schœne wart und ich gewan ie clâren lîp! des muoz ich, sældelôsez wîp, betrüeben mîne stætekeit. die göte hânt ûf mich geleit
22615	erbermeclîche râche. owê der lantsprâche, in der mîn künne wart geborn! die muoz ich leider hân verlorn und fremde zungen üeben.
22620	die friunde mîn betrüeben mac wol diz schemelîche dinc, daz mich ein fremder jungelinc ir lande hât entzücket. ir wirde muoz verdrücket
22625	von mîner swacheit iemer sîn. owê, getriuwen bruoder mîn, wie tuot iu diz sô rehte wê, daz ein gast sol über sê mich füeren sus ze lande.
22630	ez wirt ein êwic schande den Kriechen algelîche, daz von ir künicrîche wirt alsus gezücket hin der beste roup, der under in
22635	bî tûsent jâren wart gesehen. daz in diz laster sî geschehen und mir diu grôze unsælikeit, daz sî den göten iemer leit und muoz in tiure sîn geclaget,
22640	wan daz man sprichet unde saget, ez sî der sêle ein êwic nôt. ich tæte ê selber mir den tôt, ê daz ich mînen man verküre und al mîn êre alsus verlüre.
22645	Helêne dise clage treip. si brach ir vinger unde reip ir ougen liehter denne ein glas. ist, daz ir ungemüete was sô grimme als ir gebærde,
22650	sô lac vil grôz beswærde versigelt in ir herzen. si lie den jâmersmerzen an ir lîbe schouwen, daz mit ir alle frouwen
22655	begunden trûren unde clagen. grôz weinen unde hantslagen ir megde triben unde ir wîp. si leiten marter an ir lîp und wart ir ungemüete grôz.
22660	Pârîsen vaste des verdrôz, wan ez im ouch beswærde bar. dâ von der junge herre dar für die küniginne trat. mit worten er si tiure bat,
22665	daz si dur got verbære ir clagelîche swære und ir vil strengez ungemach. güetlichen er zer lieben sprach: vrouw unde werdiu künigîn,
22670	lânt iuwer hôhez trûren sîn und iuwer inneclichez clagen! wer möhte erlîden und vertragen daz jâmer, daz ir üebent? mit sorgen ir betrüebent
22675	mich unde mîne ritter. diu clage ist gar ze bitter, die man iuch, frouwe, trîben siht. gehabent iuch sô übel niht dur iuwer hôhen sælikeit!
22680	ich swer iu des vil mangen eit, daz iu vil êren wirt bekant. ir kument in ein bezzer lant, dann iuwer künicrîche sî: dâ tuot man iuch beswærde vrî
22685	mit fröuden und mit wirde. swar nâch sich iuwer girde und iuwer edel herze sent, des wirt nâch wunsche dâ gewent mit êren iuwer süezer lîp.
22690	ir werdet dâ, vil sælic wîp, mit liebe ergetzet harte der wunne, diu ze Sparte iu wart erboten aldâ her. ich wil erfüllen iuwer ger
22695	mit lîbe und mit dem guote, des lânt iu wol ze muote dur iuwer tugende werden! kein jâmer sol ûf erden iuch sêren noch verhouwen.
22700	ouch trœstent iuwer frouwen und iuwer megede beide! ze schaden noch ze leide wirt in ze Troie niht getân. ist, daz ir muot beginnet stân
22705	ze Kriechen wider in ir lant, si werden von mir hein gesant mit fröuden und mit êren. mîn vater lât si kêren gern unde willeclîche dan.
22710	ist aber, daz si wellent man zer stæte nemen und zer ê, die gît man in, waz sol des mê, nâch volleclicher werdekeit. êr unde guot daz wirt bereit
22715	in allen umbe ir minne. si werden herzoginne und landes frouwen ûz erkorn, ob si belîbent âne zorn gemeine und algelîche
22720	ze Troie in mînem rîche. Nû daz die frouwen disen trôst vernâmen, dô wart in erlôst von sorgen ir gemüete. si twanc ir wîplich güete,
22725	daz si dâ vielen alle mit einem snellen valle Pârîse für die füeze. der guoten rede süeze seitens' im gnâd unde danc.
22730	Helêne diu sprach über lanc erbermeclichen aber dô: jô stêt ez umbe uns leider sô, daz wir genâde dürftic sîn. der göte wille ist worden schîn
22735	an uns mit frevelicher kraft. als ez gebôt ir meisterschaft, als ist ez umbe uns nû gevarn. wir selbe möhten uns bewarn vor disem ungelücke niht,
22740	wan swaz si wellent, daz geschiht und muoz erfüllet werden. swer sîne gnâde ûf erden dar über an uns wendet, der tuot wol unde sendet
22745	ze gote sîn almuosen. die gêren und die buosen sint uns verlüste worden vol, dâ von bedürfen wir des wol, daz eteswer uns armen
22750	nû lâze sich erbarmen und uns genædeclichen tuo. seht, herre, dâ gedenkent zuo, sît unser heil ist iu gegeben. al unser êre und unser leben
22755	hât beslozzen iuwer pfliht. gewaltic sîn wir unser niht, noch mügen selbe niht getuon. wir sîn daz blœde rephuon, daz ein sperwer mit sîner craft
22760	in sîne clâwen hât behaft und an im sînen willen tuot. ir mügent übel oder guot an uns erzeigen, wellent ir. swaz iuwer herze und iuwer gir
22765	gebieten wil, daz muoz geschehen: des lânt uns iuwer tugende sehen und öugent an uns iuwer zuht. sît unser heil ist mit genuht in iuwer hant gevallen,
22770	sô tuont genâde uns allen. Pârîs der rede antwürte bôt. er sprach: der bitterlîche tôt mîn jungez leben veige, swenn iu mîn craft erzeige
22775	dekeiner slahte swære. sus nam der hovebære Helênen bî der hende wîz. er leite dar ûf sînen flîz, daz er si bræhte dannen.
22780	von wîben und von mannen fuort er die schœnen bî der zît in eine kemenâten wît. dâ stuont ein bette wol bereit, dar ûf ein purper was gespreit,
22785	der schein gar edel unde guot. die frouwen tugentrîchgemuot bat er dâ nider sitzen. mit worten und mit witzen begunde er trœsten ir den lîp.
22790	er sprach: genâde, sælic wîp, lânt iuwer strengez trûren abe! gedenkent, vrouwe, daz ich habe dur iuwer minneclîche gunst versprochen rîcheit unde kunst
22795	und ich der bêder wolte niht, dur daz ich mîne zuoversiht möhte an iu vollenden. ez mac nieman erwenden, mîn rîche müeze iu werden
22800	gar undertân ûf erden und allez, des ich hân gewalt. êr unde guot vil manicvalt daz wirt in iuwer hant gegeben, dâ mite sult ir iemer leben,
22805	als iu gevalle, reiniu fruht. wird unde keiserlîche zuht wil ich iu bieten mîne tage, dâ von sô lâzen iuwer clage und sint dur got genædic mir!
22810	geruochen mînes herzen gir vollenden, süeziu frouwe mîn! lânt mich, erweltiu künigîn, hie werden iuwer êlich man! ob mir des iuwer herze gan,
22815	daz mîn gelust an iu geschiht, sô wizzent, daz ich niemer niht getuon, daz iuch beswæren müge. ich sol erfüllen âne trüge, swaz iuwer munt gebiutet,
22820	wird ich von iu getriutet und als ein man gemeinet, der lange hât geweinet umb iuwer süeze minne mit ougen und mit sinne.
22825	Helêne diu sprach aber z'ime: an disen worten ich vernime, daz ich sol werden iuwer wîp. des muoz ich leben unde lîp ergeben, herre, in iuwer pfliht,
22830	wan ich enmac mich leider niht vor iu beschirmen noch ernern. möht ich gewaltes mich erwern, ich würde iu widerspænic: sus muoz ich undertænic
22835	iu werden über mînen danc. dar nâch mîn wille nie geranc, des wirde ich überwunden. ich sol bî disen stunden iu leider volgen alze vil
22840	und wellen, des ich niht enwil mit lîbe noch mit sinne. owê, daz ich der minne muoz werden hie gehôrsam. mir ist gelücke worden gram,
22845	daz kiuse ich unde merke wol: dâ von sô wil ich unde sol, swie leide mir dar an geschiht, erfüllen iuwer zuoversiht und iuwer girde nû zehant.
22850	ir hânt mich brâht in iuwer lant und ist gewalt an mir getân, dâ von möht ich iu widerstân kûm unde gar lancseime. wær aber ich dâ heime,
22855	sô wizzent, daz niht iuwer craft möht an mir werden sigehaft. Diu wort diu minneclîche sprach. geloubent, daz ir dâ geschach wol unde wê die beide:
22860	wê von dem herzeleide, daz si verlôs êr unde man; wol unde liebes vil dar an, daz ir Pârîs ze friunde wart. diu frouwe rîch von hôher art
22865	fröud unde trûren sament leit. si was betrüebet und gemeit mit ein ander bî der zît. in ir gemüete wart ein strît von liebe und ouch von leide.
22870	si viel ân underscheide in leides unde in liebes stric, doch nam daz liep an ir den sic, wan si des leides gar vergaz. ir tet dis êre verre baz,
22875	daz ir Pârîs dâ gerte z'ê, denn ir daz laster tete wê, daz si verlôs ir werden man und swaz si geltes ie gewan von küniclicher rîcheit.
22880	si saz eht allez unde beit des heiles und der stunde, daz ir der minnewunde friuntlîche bî gelæge und mit ir liebe pflæge
22885	lieplicher kurzewîle. nû was mit sneller île Pârîs ouch worden innen daz si von sînen minnen was enbrennet als ein kol
22890	und si vertragen hæte wol, daz ir der ûz erwelte degen güetlîche wære bî gelegen. Paris und Helena im Bett Er sach wol an ir ougen und an ir varwe tougen,
22895	daz ir herze sente sich. wan dô der herre wunneclich die clâren umbe ir minne bat, dô wart alsam ein rôsenblat ir bilde rôt geverwet
22900	und aber dô gegerwet in einen bleichen schîn zehant. nû daz der hôchgeborne vant an ir der minne zeichen, daz si begunde bleichen
22905	und roten von der bete sîn, dô wart diu glanze künigîn von im gehelset und gekust. er twanc si nâhe an sîne brust und umbevienc ir schœnen lîp.
22910	daz süeze minneclîche wîp vertruoc daz allez und versweic. âmehtic si dâ nider seic von herzeclichen sachen. hin ûf daz deckelachen
22915	und ûf daz bette si dâ viel. diu schœne diu bran unde wiel von minnen gar ze grunde. sô vaste si begunde erhitzen unde erwarmen,
22920	daz under sînen armen diu guote nider sleif zehant. von rehter liebe ir dô geswant und wart von trûtschefte ir wê. wes möhte Pârîs langer mê
22925	dô bîten unde warten? die clâren und die zarten lieplîche er an sîn herze twanc, dar nâch sô was vil harte unlanc, daz si ze krefte wider kam
22930	und er die frouwen minnesam gewan dâ z'einem wîbe. er wart schier an ir lîbe und an ir minne sigehaft. fröud unde lebende trûtschaft
22935	diu vant er an ir unde kôs. sîn wunne diu wart grundelôs und daz liep ân endes zil, daz im von ir minnespil und von ir lîbe wart gegeben.
22940	in beiden ein gewünschet leben von ganzer fröude widerfuor. ir herze tougenlîche swuor, daz nie gelieben würde baz. diu minne wac in unde maz
22945	gelîche ir wunnebæren solt. si wurden beide ein ander holt und âne mâze günstic. mîn zunge ist niht sô künstic, daz si betiuten künne
22950	die manicvalten wünne, die si dâ funden beide. swer ie nâch herzeleide liep unde fröude an sich gelas, der mac wol wizzen, daz in was
22955	wol unde sanfte bî der zît. si fröuten sich enwiderstrît und wart ir trûren cleine. swaz Helenâ diu reine verlüste hete enpfangen,
22960	diu was vil gar zergangen, wan si dâ volle fröude vant. man unde kint, liut unde lant lie si dâ z'einer hende gân und wolte lützel ahte hân
22965	ir êren unde ir guotes. ouch wart Pârîs des muotes, daz er dekeine swære entsaz. sîn herze des vil gar vergaz, daz Troie werden solte
22970	zerstœret, ob er wolte Helênen z'einem wîbe hân. ê daz er hæte si verlân und er ir wolte hân verborn, sîn lant daz hæte er ê verlorn
22975	und alle sîne mâge. er liez ûf einer wâge Troi unde sîne friunde sîn, und lepte er bî der künigîn mit hôher wunne manger slaht.
22980	in fröuden lâgen si die naht biz an den liehten morgen. ir trûren wart verborgen und swaz in leides ie geschach. nû daz der morgen ûf gebrach
22985	und der wunneclîche tac, Pârîs dô langer niht enlac, noch Helenâ diu guote. mit fröudenrîchem muote giengen si ze schiffe dô.
22990	si vuoren frœlich unde frô von dannen gegen Troie sît und kômen bî der tagezît schier unde snelleclîche dar. Pârîs nam ûf der verte war
22995	der frouwen sîn vil dicke. mit mangem ougenblicke begunde er warten ûf ir lîp, dâ wider sach daz schœne wîp den werden hôchgelopten man
23000	güetlûche und minneclichen an. In was vil herzeclichen wol. si wâren hôher wunne vol des nahtes worden beide, dâ von ir ougenweide
23005	wart süeze in manige wîse. Helêne wart Pârîse ein glanzer spiegel ûz erkorn: Pârîs enwas ouch niht ein dorn Helênen in ir ougen.
23010	ir blicke fuoren tougen dar unde dan, hin unde her. si truogen herzeclîche ger z'ein ander ûf dem wilden sê. sus wâren si, waz sol des mê,
23015	ze Troie komen schiere. nû si die lantriviere mit der gesihte ruorten, ir kiele si dô fuorten frœlichen hin ze stade wert.
23020	ros unde wunneclîchiu phert diu wâren in bereit zehant, wan si wolten über lant ze Troie bî den zîten von dannen gerne rîten.
23025	Ouch het Helêne ir bestiu cleit des mâles an ir lîp geleit und was gezieret alsô wol, daz man gesehen niemer sol ein wîp, diu baz gegestet sî.
23030	beswærde und aller sorgen vrî si bêde fuoren dannen. Prîant mit sînen mannen von ir künfte wart gemeit. drî mîle er in engegen reit
23035	mit rittern und mit frouwen. Pârîsen liez er schouwen und wolte in werden lân gewar, daz in sîn ougen liehtgevar gar willeclichen sâhen,
23040	wan er begunde enpfâhen den süezen werdeclîche. sîn muot was fröudenrîche von sîner kunft, des bin ich wer, nû daz Helêne kam dort her
23045	geriten mit Pârîse. nû si Prîant der wîse und al sîn hofgesinde sach, weizgot, dô dâhte er unde jach, daz er nie wîp gesæhe
23050	sô lûter noch sô wæhe, sô die vil clâren künigîn. si gap sô liehtebernden schîn und was ir dinc als ûz erkorn, daz die von Troie wol gesworn
23055	des heten algemeine, daz in diu sunne reine mit spilender fröude engegen schine. si kêrten zuo z'ir alle hine und sâhen si ze wunder an.
23060	si kunde frouwen unde man ir sinne dô berouben. man wolte des gelouben, daz menschlich crêatiure nie würde sô gehiure,
23065	noch sô kürlich als ir lîp. man hete si niht für ein wîp: man wânde, daz si wære ein engel wunnebære und ein durchliuhtic himelbote,
23070	der von dem almehtigen gote wær in daz lant gesendet. ahy, waz dâ verendet mit rede und mit gedenken wart von der liutsæleclichen art,
23075	die man kôs an ir bilde! reht als ein wunder wilde wart ir lîp gekapfet an. geriten kam si dort her dan vil sanfte als ir gemæze was,
23080	wan si fuorte Enêas und pflac ir ûf der strâze in alsô rîcher mâze, als ez ir êren wol gezam. Prîant der künic lobesam
23085	Pârîsen minneclîche enpfie. der seite im ûf ein ende, wie sich heten sîniu dinc getragen. betiuten und ze rehte sagen begunde er im diu mære,
23090	daz Helenâ dô wære geroubet von der hende sîn. er tete im sîn gelinge schîn und al sîn âventiure kunt mit rede gar biz ûf den grunt.
23095	Prîant der künic wîse nû daz er von Pârîse vernam diu lieben mære, daz allen Kriechen wære Helêne alsus enpflœhet:
23100	dô wart sîn muot erhœhet unde erfröut daz herze sîn. die frouwen lûter unde fîn begunde er schône grüezen, er hiez die clâren süezen
23105	im und den göten ûz erlesen vil tiure willekomen wesen und bôt ir werdeclîche zuht. er nam die keiserlîche fruht lieplichen under sînen arm.
23110	ir hant snêwîz reht als ein harm beslôz er in der hende sîn und gap der werden künigîn mit rede minneclichen trôst, dur daz von leide würde erlôst
23115	ir herze und ir gemüete dô. nû, vrouwe, sprach er, wesent vrô und lâzent allez trûren abe! mîn rîch und allez, daz ich habe, daz setze ich hiute in iuwer pflege,
23120	dar über sult ir alle wege gebieten und gewaltic sîn als ein erweltiu künigîn, ûf die vil êren ist gewant. niht sorgent mêr ûf iuwer lant,
23125	dâ von iuch Pârîs hât genomen. ir sît alrêrst ze lande komen und ze friunden beide. ich swer iu tûsent eide, daz man hie niemer niht getuot,
23130	wan daz gebiutet iuwer muot und iuwer herze gerne siht. swes ir geruochen, daz geschiht und wirt biz ûf ein ende brâht mit flîzeclicher andâht.
23135	Der rede Helêne antwürte bôt. trût herre, sprach si, mir tuot nôt, daz man mir hie genædic sî, sît daz ich mîner mâge vrî und mînes landes worden bin.
23140	sus triben si die stunde hin mit worten ûf der strâze. an lîbe und an gelâze Helêne muoste in allen von schulden wol gevallen,
23145	wan si was ir ougen spil, von dem si ganzer wunne vil enpfiengen unde nâmen. enpfiengen unde nâmen. nû si ze Troie kâmen, dô wart diu stat gezierde vol.
23150	Helêne wart mit gruoze wol und edelîche enpfangen. geriten und gegangen kam gegen ir vil manic schar: man unde frouwen liehtgevar
23155	enpfiengen si besunder. der zühte was ein wunder, die man ir bôt enwiderstrît. die gazzen und die strâzen wît mit rôsen wurden alle
23160	beströuwet von dem schalle, daz Helêne kam geriten. vil manic purper wol gesniten von löubern und von tieren sach man die wende zieren
23165	ir ze ruome und z'eime lobe. daz lop was allen êren obe, daz ir ze prîse wart getân. diu welt diu muoz alsô zergân, daz man enpfâhet niemer mêr
23170	sô rîlîch eine frouwen hêr, als Helenâ ze Troie wart enpfangen dur die reinen art, diu von erwelter clârheit an si nâch wunsche was geleit. Die Frauen von Troja empfangen Helena
23175	Alt unde junc, man unde wîp enpfienc ir wunneclichen lîp mit cleinœt und mit gruoze. sich huop dâ grôz unmuoze in der vil keiserlichen stift.
23180	ir wart gegeben hantgift von manger hande krâme dô, wan die burgære wâren frô, daz in diu sælde was geschehen, daz si die clâren solten sehen,
23185	diu glanz für alle frouwen schein, alsam ein lieht karfunkelstein ûz kiselingen schînet. man hete sich gepînet dar ûf mit hôhem flîze gar,
23190	daz man ir dinges neme war nâch volleclichen êren. man kunde ir fröude mêren mit wunneclichen dingen. Prîant der hiez ir singen,
23195	tambûren, harpfen, gîgen. der tac begunde ir sîgen enwec ân allez sorgen. und dô der ander morgen schôn unde wunneclîche erschein,
23200	dô wart mit triuwen under ein Pârîs und Helenâ geweben unde ein ander z'ê gegeben von des küniges handen. man pflac des in den landen:
23205	swer sîn wîp nam einem man und im si roubes an gewan, daz er ze stæteclicher ê si möhte haben iemer mê unde ir wonen solte mite.
23210	ich wæne, daz der selbe site noch in der heidenschefte wer, dâ von Pârîs mit reiner ger nâch der gewoneheite fuor. nû daz der jungelinc geswuor
23215	Helênen ganze stæte und si gemahelt hæte, dô wart ein hôchgezît gemaht unde ein hof, der siben naht mit hôhen êren werte.
23220	swaz ieman vröuden gerte, diu vant er dâ mit voller craft. ez wart sô ganze wirtschaft nie beschouwet noch bekant, sô man zer hôchgezîte vant,
23225	diu ze Troie dâ geschach. dâ funden küneclich gemach die kunden und die geste. vröud unde wunne veste si truogen mit ein ander.
23230	diu wîssagîn Cassander, des künges tohter reine, was trûric alters eine. Sich fröute dâ man unde wîp biz an ir wunneclichen lîp,
23235	wan si weste wol den schaden, der ûf Troie sît geladen wart von dem briuteloufte. des sluoc sich unde roufte diu werdiu küneclîche fruht
23240	und lie vil strenge jâmersuht an ir beschouwen über lût. si zarte ir rœselehte hût ab ir wangen und daz vel. ir hâr alsam ein sîde gel
23245	ûz der swarten si dô brach. si rief mit jâmer unde sprach: ach mir armen unde owê! wâfen hiute und iemer mê! waz sol ze Troie noch geschehen,
23250	sô man die stat beginnet sehen zerbrochen und zervallen? diu hôchgezît uns allen muoz komen gar ze sûre. die porten und die mûre
23255	zerstœret man dur die geschiht, daz man Pârîsen hiute siht hie mit Helênen briuten. man hœret noch erliuten vil jæmerlîche stimme
23260	dur die beswærde grimme, die manic herze lîdet. sô man ze tôde snîdet mit swerten unser liute, sô müezen wir der briute
23265	engelten alsô sêre. owê mir iemer mêre! waz muoz ich jâmers dulden von mîner mâge schulden, die man vor mînen ougen
23270	verderbet âne lougen unde ir bluot muoz hie verschüten! ob ez die göte mir gebüten, sô wolte ich gerne sterben ê, dur daz ich niht daz grimme wê
23275	müest an ir lîbe schouwen. ahlês, ir frîen frouwen unde ir hôchgebornen wîp, waz sol sich iuwer reiner lîp genieten swære umb iuwer man,
23280	sô man in strenge marter an und engestlichen schaden tuot! hie wirt ir edelez tiurez bluot erbermeclîche fliezende und allenthalp begiezende
23285	die strâze und ouch die gazzen. ich wil die fröude bazzen, die man vor mir hie stiftet. betrüebet und vergiftet wirt si mit herzeleide.
23290	owê der ougenweide, der manic lîp hie wirt gewon, sô der turn Ilîon zerstœret wirt von grunde und manic tiefe wunde
23295	hie werden muoz geschrôten. hei, waz ich armiu tôten muoz schouwen unde kiesen! owê, daz ich verliesen sol mîne werden bruoder!
23300	hie wirt vil manic fuoder von bluote noch verrêret und manic lîp versêret dur disen veigen briutelouft. diu minne tiure wirt gekouft,
23305	der Pârîs und Helêne pfliget. ein trûren si noch wider wiget, daz niht gebüezet werden mac biz an den jungestlichen tac und iemer êweclichen wert.
23310	owê, daz man der fröude gert, diu sich mit jâmer endet. zervüeret und verswendet wirt hie ze Troie manic sal dur disen hovelichen schal,
23315	der sich nû leider hât erhaben. vil manic herze wirt begraben in grundelôser nœte gar, vil manic wange rôsenvar wirt betrüebet unde bleich
23320	dur den vertânen hîleich, den Pârîs hât gestellet. sîn fröude wirt vergellet mit bitterlicher siure. mit swerten und mit fiure
23325	wirt gerochen sîn getât, daz er diz wîp gezücket hât in roubes wîs den Kriechen: des muoz an êren siechen diz künecrîch ân endes zil.
23330	sîn lebelichez wunnespil mit sorgen wirt getœtet, sô Troie wirt gerœtet vil gar mit bluotes touwe. ich wil, daz manic frouwe
23335	ir blanken hende linde dur sîne fröude winde und umbe in weinen müeze. sîn hôchgemüete süeze betrüebet manger muoter kint.
23340	owê, daz alle, die der sint, niht helfen clagen dise nôt und den verlüstebæren tôt, der hie ze Troie sol ergân! owê, daz ich verloren hân
23345	muoz vater unde muoter! wê, daz nieman sô guoter wirt funden hie ze lande, der mir diz manger hande jâmer helfe schrîen,
23350	daz noch in dirre vrîen stat sol werden offen. ich wolte mich versloffen hân zuo der helle danne, sô man hie manigem manne
23355	lîp unde leben zücket: dur daz ich niht gedrücket würd in die bitterlichen nôt, daz ich mâg unde friunde tôt vor mînen ougen sehe ligen.
23360	ach, bruoder, wes hât uns gezigen dîn übervart in Kriechenlant! daz rîche werden muoz gepfant an küniclichen êren dur dîn vertânez kêren,
23365	daz dû von Troie tæte. Prîant mîn vater stæte und Ekubâ diu muoter mîn verwîset müezen iemer sîn ir landes unde ir liute gar
23370	von dîner schedelicher var.

<<< Übersicht <<< vorige Seite nächste Seite >>>

Der Trojanerkrieg

Der Raub der Helena

Die List des Paris. Die Entführung.

Rückkehr nach Troja. Die Hochzeit.

Die Klage der Cassandra.

22375 - 23370

22375

Hie mite was diu rede hin,

die si dâ triben under in

von ir zweiger dinge.

dem werden jungelinge

tet der schœnen minne wê.

22380

daz er mit ir niht solte mê

teidingen unde kôsen,

daz mahte in sigelôsen

an lieber zuoversihte.

dar under von geschihte

22385

wart daz spengelîn enthaft,

daz mit sînes dornes craft

beslôz Helênen houbetloch

dâ von kam er in swære doch

unde in bitter ungemach;

22390

wan dô der jungelinc ersach

ir kelen und ir blôze hût,

dô wart geverwet über lût

sîn bilde alsam ein tôte gel.

ir lûter und ir blankez vel

22395

geschuof, daz er ûf jâmer wiel

und er in unmaht nider viel,

als im geswunden wære.

dar nâch der tugendebære

wart mit jâmer ûf genomen,

22400

wan daz gesinde was dô komen,

daz in fuorte an sîn gemach.

und alzehant dô diz geschach,

daz er ze creften wider kam,

dô wart der ritter lobesam

22405

dar ûf gedenkend alle stunt,

wie im diu state werde kunt,

daz er mit sînen mannen

die schœnen bræhte dannen.

Er hete ir rede gemerket:

22410

des wart sîn muot gesterket

an der gelustekeite sîn.

diu werde süeze künigîn

dâ vor gesprochen hæte,

si wolte, swes er bæte,

22415

daz er si des betwünge noch.

dâ von der ûz erwelte doch

heinlîche wart ze râte,

daz er si wolte drâte

dannen zücken unde steln.

22420

den willen er begunde heln

vor der vrouwen minnesam.

er fuorte dâ Pollidamam

an eine tougenlîche stat

und hiez in heimlîch unde bat,

22425

daz er kêrte zuo der habe

still unde tougenlichen abe,

dâ sîne ritter wæren,

und er die tugentbæren

geswinde kumen hieze.

22430

und daz er niht enlieze,

in würde von im kunt getân,

sô der tac begünde ûf gân,

daz alle kæmen snelle

und si vor dem kastelle

22435

der küneginne rîche