Der Nibelunge Nôt

31. Aventiure

___________________________________________________

Aventivre wie die herren

ze kirchen giengen

1849

Mir chvlent so di ringe | so sprach volker

ia waene div naht vns welle | nv niht wern mer

ich chivs ez von dem lvfte | ez ist schiere tach

do wachten si do manigen | der noch slaffende lach

1850

do erschein der liehte morgen | den gesten in den sal

hagen begonde wechen | di ritter veber al

ob si zv dem mvenster | cer messe wolden gan

nach sitten cristenliche | man vil livten began

1851

si svngen vngeliche | daz da vil wol schein

cristen vnde heiden | di warn niht enein

do wolden zv der kirchen | di gventheres man

si waren von den betten | al geliche gestan

1852

do naeten sich di rechen | in also gvt gewant

daz nie helde maere | in deheines chveneges lant

ie bezzer kleider braten | daz was hagenen leit

er sprach ia svlt ir helde | hi tragen anderiv chleit

1853

ia sint iv doch genvgen | div maere wol bechant

nv trage fver di rosen | div waffen an der hant

fver shapel wol gesteinet | di liehten helme gvt

sit daz wir wol erchennen | der argen criemhilden mvot

1854

wir mvzen hivte striten | daz wil ich iv sagen

ir svlt fver siden hemde | di halsperge tragen

vnd fver di richen mentel | di gvten schilde wit

ob iemen mit iv zvrne | daz ir vil werliche sit

1855

mine lieben | darzv mage vnd man

ir svlt vil willechlichen | zv der kirchen gan

vnde chlaget got dem richen | iwer sorge vnd iwer not

vnd wizzet sicherlichen | daz vns nahet der tot

1856

irn svlt ovch niht vergezen | swaz ir habet getan

vnde svlt vil vlizzechliche | da gein gote stan

des wil ich ivch warnen | rechen vil her

ez en welle got von himle | ir vernemet messe nimmer mer

1857

svs giengen zv dem mvenster | di fvrsten vnd ir man

vf dem vronem vrithove | da hiez si stille stan

hagen der chvene | daz si sich schieden niht

er sprach ia weiz ez noch niemen | waz von den hivnen vns geschit

1858

leget mine frivnde | di schilde fver den fvz

vnde geltet ob iv iemen welle | bieten swachen grvz

mit tieffen verchwunden | daz ist hagenen rat

daz ir so werdet fvnden | daz ez iv lobelichen stat

1859

volker vnd hagene | di zwene giengen dan

fver daz wite mvenster | daz wart dvrh daz getan

daz si daz wolden wizen | daz des chveneges wip

mvse mit in dringen | ia was vil grimmech ir lip

1860

do chom der wirt des landes | vnd ovh sin schoene wip

mit richem gewande | gezieret was ir lip

vnd ovch vil sneller rechen | di man sach mit ir varn

do chos man hohe stovben | von der criemhilde scharn

1861

do der chvenech riche | svs gewaffent sach

di chvenege vnd ir gesinde | wi balde er do sprach

wi sihe ich frivnde mine | vnder helme gan

mir ist leit vf mine triwe | vnd hat in iemen iht getan

1862

ich solz in bvezen gerne | swi si dvnchet gvt

hat iemen in besweret | daz herce vnd ovch den mvt

des bringe ich si wol innen | daz ez mir ist vil leit

swaz si mir gebietent | des pin ich in alles bereit

1863

des antwurte hagene | vns hat niemen niht getan

ez ist sitte miner herren | daz si gewaffent gan

zallen hohgeziten | ce vollen drien tagen

swaz man vns hi getaete | wir soltenz eceln sagen

1864

vil wol horte criemhilt | waz do hagen sprach

wi rehte fientliche | si im vnder sach

si ne wolde doch niht melden | den site von ir lant

swi lange si den hete daz | cen bvrgonden bechant

1865

swi grimme vnd swi starch | si in vient waere

het im iemen gesagt | div rehten maere

er het wol vnderstanden | daz doch sit da geshach

dvrch ir vil starche vbermvt | ir deheiner im es veriach

1866

do gi vil groziv menege | mit der chveneginne dan

do ne wolden dise zwene | doch niht hoher stan

zweir hande breite | daz was den hivnen leit

ia mvsen si sich dringen | mit den helden gemeit

1867

eceln kameraere | di ne dvhte daz niht gvt

ia heten si den rechen | erzvernet do den mvt

wan daz si ne torsten | vor dem chvenege her

da was vil michel dringen | vnt do niht anders mer

1868

do man da gote gediende | vnt daz si wolden dan

vil balde chom cen rossen | vil manech hivnen man

do was bi criemhilde | manech schoniv meit

wol siben tvsent degene | bi der chveneginne reit

1869

criemhilt mit ir vrowen | in div venster gesaz

zv ecel dem richen richen | vil liep was im daz

si wolden schowen riten | di helde vil gemeit

hey waz vremder recken | vor in vf dem hove reit

1870

do was ovch der marschalch | mit den knehten chomen

danchwart der vil chvene | der het zv zim genomen

sines herren ingesinde | von bvergonden lant

div ross man wol gesatelt | den chvenen nibelvngen vant

1871

do si cen rossen chomen | di chvenege vnde ovch ir man

volker der starche | raten daz began

si solden bvhvrdiren | nach ir landes siten

des wart von den helden | sit vil herlich geritten

1872

der helt het in geraten | des si doch niht verdroz

der bvhvrt vnt daz shallen | div wurden beide groz

vffe den hoff vil witen | chom vil manech man

ecel vnde criemhilt | daz selbe schowen began

1873

vff den bvhvrt chomen | sehs hvndert degene

der dieteriches rechen | den gesten cegegene

si wolden chvrcewile | mit den bvrgonden han

het ers in gegvnnen | si hetenz gerne getan

1874

hey waz gvter rechen | in da nach reit

dem herren dieteriche | daem wart daz geseit

mit gvntheres mannen | daz spil er in verbot

er vorhte siner manne | des gie im sicherlichen not

1875

do dise von berne | gescheiden waren dan

do chomen von bechelaren | di rvedegeres man

fvnfhvndert vnder schilde | fver den sal geritten

liep waere dem margraven | daz siz heten vermitten

1876

do reit er wislichen | zv zin dvrh di schar

vnde sagete sinen degenen | si waeren des gewar

daz in vmmvte waeren | di gvntheres man

ob si den bvhvrt liezen | ez waere im liebe getan

1877

do si von in geschieden | di helde vil gemeit

da chomen di von dveringen | als vns daz ist geseit

vnt der von tenemarchen | wol tvsent chvener man

von stichen sach man vliegen | vil der trvnzvne dan

1878

irnfrit vnde hawart | in den bvhvrt ritten

ir heten di von rine | vil stolzlich erbitten

si bvten manige tioste | den von dveringen lant

des wart von stichen dverchel | vil manich herlicher rant

1879

do chom der herre bloedelin | mit drin tvsent dar

ecel vnd criemhilt | namen sin vil wol war

wande vor in beiden | div ritterschapft geshach

div chveneginne ez gerne | dvrch leit der bvrgonden sach

1880

scrvtan vnde gybecke | vf den bvhvrt ritten

ramvnch vnd hornboge | nach hivnisschen sitten

si hielten gegen den helden | von bvrgonden lant

di shefte draeten hohe | veber des kvneges sals want

1881

swes iemen da pflaege | so was ez niwan schal

man horte von schilde stoezzen | palas vnde sal

harte lvt erdiezzen | von gvntheres man

den lob daz sin gesinde | mit grozen eren gewan

1882

do was ir chvrcewile | so michel vnd groz

daz dvrch di chovertvere | der blanche sweiz do floz

von den gvten rossen | div di helde ritten

si versvchtenz an di hivnen | mit vil hohvertegen sitten

1883

do sprach der chvene recke | volker der spilman

ich waen vns dise recken | tverren niht bestan

ich hort ie sagen maere | si waeren vns gehaz

nv ne chvndez sich gefvegen | zware ninder baz

1884

zen herbergen fveren | sprach aber volfger

sol man vns di moere | vnd riten danne mer

gegen abende | so des wirdet zit

waz op div chvneginne | den lop den bvergonden git

1885

do sahens einen riter | so weigerlichen hie

daz al der hivnen | getet deheiner nie

ia moht er in den ziten | wol haben hercentrvt

er fvor so wol gechleidet | sam eines edeln ritters prvt

1886

do sprach aber volker | wi moeht ich daz verlan

iener trvt der vrowen | mvz ein gepveze han

ez chvnde niemen gescheiden | er gat im an den lip

ichn rvche ich ob ez zverne | des kvenech eceln wip

1887

nein dvrch mine liebe | sprach der kvenech san

ez wizent vns di livte | vnd ob wir si bestan

ir lat iz heben di hivnen | daz fveget sich noch baz

dannoch der kvenech ecel | bi der chveneginne saz

1888

ich wil den bvhvrt meren | sprach do hagene

lat di vrowen schowen | vnd di degene

wi wir chvennen riten | daz ist gvt getan

man git doh lop deheinen | des chvenech gventheres man

1889

volker der vil snelle | den bvhvrt widerreit

daz wart sit maniger vrowen | vil groezliche leit

er stach dem richen hivnen | daz sper dvrch sinen lip

daz sach man sit beweinen | beide maget vnd wip

1890

vil harte hvrtechliche | hagen vnde sine man

mit sehzech siner degene | riten er began

nach dem videlaere | da daz spil gesach

ecel vnde criemhilt | ez besheidenlichen sach

1891

do ne wolden di dri kvenege | den ir spileman

bi den fianden | niht ane hvte lan

da wart von tvsent helden | vil crepftelich geritten

si taten daz si wolden | in vil hohvertechlichen sitten

1892

da der riche hivne | ce tode wart erslagen

man hort sine mage | rvoffen vnd chlagen

do rvft al daz gesinde | wer hat ez getan

daz hat der videlaere | volker der chvene spileman

1893

nach swerten vnd nach schilden | rieffen da zehant

des margraven mage | von der hivnen lant

si wolden volkeren | ce tode erslagen han

der wirt vz einem venster | vil harte gahen began

1894

do hvb sich von den livten | allenthalben schal

di chvenege vnde ir gesinde | erbeizten fver den sal

div ross ce rvcke stiezen | di bvergonden man

do chom der kvenech ecel | der herre ez scheiden began

1895

ein des hivnen mage | den er bi im vant

ein vil starchez waffen | brach er im vz der hant

do slvch ers alle widere | wand im was vil zorn

wi het ich minen dienest | an disen helden verlorn

1896

ob ir hi bi mir slveget | disen spilman

sprach der kvenech ecel | daz waere missetan

ich sach vil wol sin riten | do er den hivnen stach

daz ez von einem strvche | an sine schvlde gesach

1897

ir mvezet mine geste | vride lazen han

do wart ir geleite | div ross div zoh man dan

zv den herbergen | si heten manegen kneht

di im mit vlize waren | zallem dieneste gereht

1898

der wirt mit sinen frivnden | in den palas gie

zorn er mer deheinen | da niht werden lie

do rihte man di tissche | daz wazer man in trvch

da heten di von rine | der starchen viende genvch

1899

e di herren gesazen | des was harte lanch

div criemhilde sorge | si ce sere twanch

si sprach fverste von berne | ich svches dinen rat

helffe vnde genade | min dinch mir angestlichen stat

1900

des antwurte ir hildebrant | der recke lobelich

swer sleht di nibelvnge | der tvt iz ane mich

dvrch deheines shazes liebe | ez mach im werden leit

si sint noch vmbetwungen | di snellen ritter gemeit

1901

do sprach in sinen zvehten | darzv her dieterich

di bete la beliben | chveneginne rich

mir habent dine mage | der leide niht getan

daz ich di degen chvene | mit strite welle bestan

1902

div bet dich lvecel eret | vil edels fversten wip

daz dv dinen magen | raetest an den lip

si chomen vf genade | her in diz lant

sifrit ist vngerochen | von der dieteriches hant

1903

do si der vntruwe | an dem bernaere nine vant

do lobtes also balde | in bloedelines hant

eine riche marche | di nvdvnch e besaz

sit do slvch in danchwart | daz er der gabe gar vergaz

1904

si sprach dv solt mir helffen | herre bloedelin

ia sint in disem hvse | di viande min

di slvgen sifriden | den minen lieben man

swer mir daz hilffet rechen | dem bin ich immer vndertan

1905

des antwurte ir bloedelin | vrowe nv wizzet daz

ia ne getar ich in vor eceln | geraten cheinen haz

wande er di dine mage | vro vil gerne sihit

taet ich in iht ce leide | der kvnech vertrvege mir sin niht

1906

neina herre bloedelin | ich pin dir immer holt

ia gib ich dir ce miete | silber vnde golt

vnde eine maget schoene | daz nvdvnges wip

so maht dv gerne trivten | den ir vil minnechlichen lip

1907

daz lant zv den bvergen | wil ich dir allez geben

so maht dv ritter edel | mit vrevden immer leben

gewinnestv di marche | da nvdvnch inne saz

swaz ich dir gelobe hivte | mit triwen leist ich dir daz

1908

do der herre blodelin | di miete da vernam

vnt daz im dvrch ir schoene | div vrowe wol gezam

mit strite wande er dienen | daz minnechliche wip

darvmbe mvose der recke | do verliesen den lip

1909

er sprach cer chveneginne | get wider in den sal

e is iemen werde innen | so heb ich einen schal

ez mvz erarnen hagene | daz er iv hat getan

ich antwurte iv gebvnden | des kvenech gventheres man

1910

nv waffent ivch sprach blodelin | alle mine man

wir svln den vianden | in di herberge gan

des wil mich niht erlazen | daz eceln wip

darvmbe svln wir helde | alle wagen den lip

1911

do div chveneginne | bloedelinen lie

in des strites willen | ce thisse si do gie

mit ecel dem chvenege | vnde ovch mit sinen man

si hete swinde raete | an di geste getan

1912

do der strit niht anders | chvnde sin erhaben

criemhilt ir leit daz alte | in ir hercen was begraben

do hiez si tragen cen tissen | den eceln svn

wi chvnde ein wip dvrch rache | immer vreislicher getvn

1913

dar giengen an der stvnde | di eceln man

si trvgen ortlieben | den ivngen kvenech dan

zv der fversten thisse | da ovch hagen saz

des mvse daz chint ersterben | dvrch sinen mortlichen haz

1914

do der kvenech riche | sinen svn ersach

zv sinen chonemagen | er gvetliche sprach

nv seht ir frivnt di mine | daz ist min einech svn

vnd ovch iwer swester | daz mach iv allen wesen frvm

1915

gevaehet er nach dem chvenne | ez wirt ein chvene man

rich vnd vil edel | starch vnde wolgetan

leb ich deheine wile | ich gip im zwelf lant

so mag iv wol gedienen | des edeln ortliebes hant

1916

darvmbe bit ich gerne | ivch liebe frivnde min

swenne ir ce lande ritet | wider an den rin

so svlt ir mit iv fveren | iwerr swester svn

vnd svlt ovch an dem chinde | vil genaedechlichen tvn

1917

vnde ziehet in cen eren | vnz er werde ce man

hat iv in dem lande | iemen iht getan

daz hilffet er iv rechen | gewehsset im sin lip

di rede hort ovch criemhilt | des kvenech eceln wip

1918

im solden wol getruwen | dise degene

gewuehs er ceinem manne | so sprach hagene

doch ist der kvenech ivnge | so veichlich getan

man sol mich sehen selten | ce hove nach ortliebe gan

1919

der chvenech an hagenen blichte | div rede was im leit

swi niht darvmbe redete | der fverste vil gemeit

ez betrvbete im sin herce | vnde beswarete im den mvt

do ne was der hagen wille | niht ce chvercewile gvt

1920

ez tet den fversten allen | mit dem kvenege we

daz hagen von sinem chinde | het gesprochen e

daz siz vetragen solden | daz was in vngemach

sin wessen niht der maere | waz von dem recken sit geschach