Der Nibelunge Nôt

29. Aventiure

___________________________________________________

Aventivre wie hagene vnd volker

vor chriemhilt sal sazen

1758

Do schieden sich di zwene | recken lobelich

hagen von tronege | vnt ovch her dieterich

do blichte veber ahsel | der gvntheres man

nach einem hergesellen | den er vil schiere gewan

1759

do sah er voelker | bi giselhere sten

den spaehen videlaere | bat er mit im gen

wand er vil wol erchand | sinen grimmen mvt

er was an allen dingen | ein ritter chvene vnd gvt

1760

noch liezen si di herren | vf dem hove stan

niwan si zwene aleine | sach man dannen gan

veber den hof vil verre | fver einen palas wit

di vzerwelten degene | vorhten niemenes nit

1761

si gesazen vor dem hvse | gegen einem sal

der was criemhilde | vf eine banch ce tal

do lvhte in von ir libe | ir herlich gewant

genvge da si sazen | si heten gerne bechant

1762

alsam tier div wilden | wurden gekapffet an

di vebermevten helde | von den hivnen man

si ersah ovch dvrch ein fenster | daz eceln wip

des wart aber betrvebet | der schonen criemhilden lip

1763

ez mante si ir leide | weinen si began

des hete michel wunder | di eceln man

waz ir so schiere | betrvebet het den mvt

si sprach daz hat hagene | ir helde chvne vnde gvt

1764

si sprachen zv der vrowen | wi ist daz geschehen

wand wir ivch niwliche | haben vro gesehen

nie niemen wart so chvene | derz iv hat getan

heizet irz vns rechen | ez sol im an sin leben gan

1765

daz wold ich immer dienen | swer reche miniv leit

alles des er gerte | des waer ich im bereit

ich bivte mich iv ce fvzen | sprach des chvenges wip

rechet mich an hanege | daz er vliese den lip

1766

do garten sich vil balde | sehzech chvner man

dvrh crimhilde willen | si wolden hine gan

vnd wolden slahen hagenen | den vil chvenen man

vnd ovch den videlaere | daz wart mit rate getan

1767

do div chveneginne | ir shar so chleine sach

in einem grimmem mvte | si zv den helden sprach

des ir da habt gedingen | des svlt ir abe gan

ia ne dvrffet ir so ringe | nimmer hagenen bestan

1768

swi starch vnt swi chvene | von tronege hagen si

noch ist er verre staercher | der im da sizet bi

volker der videlaer | der ist ein vebel man

ia ne svlt ir di helde | niht so lihte bestan

1769

do si daz gehorten | do gart sich ir mer

vier hvndert sneller recken | div kveneginne her

was des genoete | daz si in taete leit

davon wart sit degenen | vil michel sorge bereit

1770

do si vil wol gevafent | daz ir gesinde sach

zv den snellen recken | div kveneginne sprach

nv bitet eine wile | ia svlt ir stille stan

ich wil vnder crone | zv minen vianden gan

1771

vnde hoeret itwizze | waz mir hat getan

hagen von tronege | der gventheres man

ich weiz in so vebermveten | daz er mir lovgent niht

so ist ovch mir vnmaere | swaz im darvmbe geshihit

1772

do sach der videlaere | ein chvene spilman

di edeln chveneginne | ab einer stiege gan

nider von einem hvse | als er daz gesach

voker der vil chvene | zv sinem hergesellen sprach

1773

nv schowet vrivnt hagene | wa si dort her gat

div vns ane triwe | inz lant geladet hat

ine gesach mit kvenges wibe | nie so manegen man

di swert enhend trvegen vnd | also stritechlichen gan

1774

wizet ir frivnt hagene | ob si iv sin gehaz

so wil ich iv raten | ir hvetet deste baz

des libes vnt der eren | ia dvnchet ez mich gvt

als ich mich versinne | si sint zornech gemvt

1775

vnd sint ovch svemeliche | cen brvsten also wit

swer sin selbes hvete | der tv daz en zit

ich waen si di liehten brvenne | nv darvnder tragen

wen si damit meinen | daz en chan ich niemen gesagen

1776

do sprach in zornes mvote | hagen der chvene man

ich weiz wol daz iz allez | ist vf mich getan

daz si div liehten waffen | tragent an der hant

vor den moeht ich noch geriten | in der bvrgonden lant

1777

nv sagt mir vrivnt volker | ob ir mir welt gestan

ob wellent mit mir striten | di criemhilde man

daz lazet ir mich hoeren | als lieb als ich iv si

ich won iv immer mere | mit triwen dienstlichen bi

1778

ich hilf iv sicherlichen | sprach der spilman

ob ich uns engegene | saehe den kvnech selbe gan

mit allen sinen recken | di wile ich leben mvz

so entwich ich iv dvrch vorhte | nimmer einen fvz

1779

nv lon iv got von himele | vil edel volker

ob si mit mir striten | wes bedarf ich danne mer

sit ir mir helffen wellet | als ich han vernomen

so svln dise recken | wil gewaerlichen chomen

1780

nv ste wir von dem sedele | sprach der spilman

si ist ein chveneginne | vnd lat si fvr gan

bietet ir di ere | si ist ein edel wip

damit ist ovch getivret | vnser ieweders lip

1781

nein dvrch mine liebe | sprach aber hagene

so wolden sich versinnen | dise degene

daz ichz dvrch vorhte taete | vnd sold ich hin gen

ich en wil dvrch ir deheinen | nimmer von dem sedele sten

1782

ia zimet ez vns beiden | zeware lazzen daz

zwiv sold ich den eren | der mir ist gehaz

daz en getvn ich nimmer | di wile ich han den lip

ovch en rvch ich waz mich genidet | des kvnech ecelen wip

1783

der vebermvete hagene | leit veber siniv bein

ein vil liehtez waffen | vz des knopffe shein

ein vil liehter iaspes | grvener danne ein gras

wol erchand ez criemhilt | daz ez sifrides was

1784

do si daz swert erchande | do gi ir trvrens not

sin gehelze daz was gvldin | div scheide ein porte rot

ez mante si ir leide | weinen si began

ich waene ez hete darvmbe | der chvene hagen getan

1785

volker der snelle | zoch naher vf der banch

einen videlbogen starchen | vil michel vnd lanch

gelich einem swerte | vil sharpf vnde breit

do sazen vnder vorhte | di zwene degene gemeit

1786

nv dvhten sich so here | di zwene chvene man

daz si niht wolden | von dem saedel stan

dvrch niemens vorhte | des gie in an den fvz

div edele chveneginne | vnd bot in vientlichen grvz

1787

si sprach der hagene | wer hat nach iv gesant

daz ir getorstet riten | her in diz lant

vnde ir daz wol erchandet | waz ir mir habet getan

hetet ir gvete sinne | ir soldet ez pilliche lan

1788

nach mir sande niemen | sprach do hagene

man ladete her ce lande | drie degene

di heizent mine herren | vnd bin ich ir man

in deheiner hovereise | bin ich selten hinder in bestan

1789

si sprach nv sagt mir mere | zwiv tatet ir daz

daz ir daz habt verdienet | daz ich iv bin gehaz

ir slvoget sifriden | den minen lieben man

des ich vnz an min ende | immer genvch ce weinen han

1790

er sprach waz sol des mere | der rede ist nv genvch

ich pinz aber hagene | der sifriden slvch

den helt ce sinen handen | wi sere er des engalt

daz div schoene criemhilt | di vrovn prvnnhilden shalt

1791

ez ist et ane lovgen | chvneginne rich

ich han es alles shvlde | des schaden shedelich

nv rechez swer der welle | ez si wip oder man

ich en wolde danne liegen | ich han iv leides vil getan

1792

si sprach nv hoert ir rechen | wa er mir lovgent niht

aller miner leide | swaz im davon gesiht

daz ist mir vil vnmaere | ir eceln man

di vebermveten degene | einander sahen si an

1793

swer den strit da hvebe | so waere daz geschehen

daz man den zwein gesellen | der eren mvese iehen

wan siz in stvrmen heten | vil diche wol getan

des sich iene vermazen | dvrch vorhte mvsen si daz lan

1794

do sprach ein der rechen | wes seht ir mich an

daz ich e da lobte | des wil abe gan

daz ich dvrch niemens gabe | verliesen wil den lip

ia wil vns verleiten | des kvnech eceln wip

1795

do sprach dabi ein ander | des selben han ich mvt

der mir gaebe tverne | von rotem golde gvt

disen videlaere | wold ich niht bestan

dvrch sine swinden bliche | di ich an im gesehen han

1796

ovch erchenne ich hagenen | von sinen ivngen tagen

des mach man von dem rechen | lihte mir gesagen

in zwein vnd zweinzech stvrmen | han ich in gesehen

da vil maniger vrowen | ist herceleit geschehen

1797

er vnt der von spanye | taten manegen stich

do si hi bi eceln | vahten manech wich

ce eren dem chvenege | des ist vil geschehen

darvmb mvz man hagenen | der eren pilliche iehen

1798

dannoch was der reche | siner iar ein chint

daz do di tvmben waren | wi grise di nv sint

nv ist er chomen ce witzen | vnd ist ein grimmech man

ovch treit er palmvngen | daz er vil vebele gewan

1799

damit was gescheiden | daz niemen da ne streit

do wart der chveneginne | hercenlichen leit

di helde cherten dannen | ia vorhten si den tot

von dem videlaere | des gie in sicherlichen not

1800

do sprach der videlaere | wir haben daz wol ersehen

daz wir hi vinde vinden | als wir e horten iehen

wir svln zv den chvenegen | hin ce hove gan

so ne tar vnser herren | mit strite niemen bestan

1801

wi dicke ein man dvrch vorhte | manigiv dinch verlat

swa so frivnt bi frivnde | frivntlichen stat

vnd hat er gvote sinne | daz ers nine tvt

schade vil maniges | wirt von sinnen wol behvt

1802

nv wil ich iv volgen | sprach do hagene

si giengen da si fvnden | di zieren degene

in grozem antpfange | an dem hove stan

volker der vil chvene | vil lvte sprechen began

1803

zv den sinen herren | wi lange welt ir sten

daz ir ivch lazet dringen | ir svlt ce hove gen

vnde horet an dem kvenege | wi er si gemvt

do sach man sich gesellen | di helde chvene vnd gvt

1804

der fvrste von berne | nam an di hant

gvntheren den vil richen | von bvrgonden lant

irnfrit der nam gernoten | den vil chvnen man

do sach man rvdgeren | ce hove mit giselheren gan

1805

swi iemen sich gesellete | vnd ovh ce hove gie

volker vnde hagen | di geschieden sich nie

niwan in einem stvrme | an ir endes zit

daz mvsen edel vrowen | beweinen groezlichen sit

1806

do sach man mit den kvenegen | hin ce hove gan

ir edeln ingesindes | tvsent chvener man

darveber sehzech rechen | di waren mit in chomen

di het in sinem lande | der chvene hagen genomen

1807

hawart vnd ovch irinch | di zwene vzerwelten man

di sach man gesellichen | bi den chvenegen gan

danchwart vnd wolfhart | ein tiwerlicher degen

di sach man wol ir tvgende | vor den anderen pflegen

1808

do der vogt von rine | in den palas gie

ecel der vil riche | daz langer niht en lie

er spranch von sinem sedele | als er in chomen sach

er grvz so rehte schoene | von den chvnegen im geschach

1809

sit willechomen her gvnther | vnd ovch her gernot

vnd iwer brvder giselher | min dienest ich iv enbot

mit triwen vlizechlichen | ce wormez veber rin

vnd allez daz gesinde | sol mir willechomen sin

1810

nv sit vnz goze willechomen | ir zwene degene

volker der vil chvene | vnd ovch hagene

mir vnd miner vrowen | her in dizze lant

si hat iv boten manige | hin ce rine gesant

1811

do sprach von tronege hagene | des han ich vil vernomen

waere ich dvrch mine herren | cen hivnen her niht chomen

so waere ich iv cen eren | geritten in daz lant

do nam der wirt vil edele | di lieben geste bi der hant

1812

er brate si cem sedele | da er selbe saz

do schancte man den gesten | mit vlize tet man daz

in witen goldes schallen met | moraz vnde win

vnde bat di ellenden | groze willechomen sin

1813

do sprach der kvnech ecel | des wil ich iv veriehen

mir en chvnde in dirre werlde | lieber niht geschehen

denne ovch an iv helden | daz ir mir sit bechomen

des ist der chveneginne | vil michel trvren benomen

1814

mich nimt des michel wunder | waz ich iv habe getan

so manigen gast vil edel | den ich gewunnen han

daz ir nie gervchtet | chomen in miniv lant

daz ich ivh nv gesehen han | daz ist cen vrevden mir gewant

1815

des antwurte rvedeger | ein ritter hohgemvt

ir mvgt si sehen gerne | ir triwe div ist gvt

der minen vrowen mage | so schone chvnnen pflegen

si bringent iv ce hvse | vil manegen waetlichen degen

1816

an svnewenden abent | di herren waren chomen

in eceln hof des richen | vil selten ist vernomen

von also hohem grvze | als er di helde enpfie

nv was ovch ezens zit | der rvedger mit in ce tisshe gie

1817

ein wirt bi sinen gesten | schoner nie gesaz

man gab in vollechlichen | trinchen vnde maz

alles des si gerten | des was man in bereit

man hete von den helden | vil michel wunder geseit