Der Nibelunge Nôt

21. Aventiure

___________________________________________________

Aventivre wie chriemhilt von wormze schiet

do si gein den hvnen fvor

1290

Di boten lazen riten | wir svln iv tvn bechant

wi div chvneginne | fvere dvrch div lant

oder wa von ir schiden | giselher vnd gernot

si heten ir gedienet | als in ir triwe daz gebot

1291

vnz an di tvnowe | ce vergen si do ritten

si begonden vrlovbes | di chvenegin bitten

wan si wider wolden | riten an den rin

do ne moht ez ane weinen | von gvten frivnden niht gesin

1292

giselher der snelle | sprach cer swester sin

swenne daz dv vrowe | bedvrfen wellest min

ob dir iht gewerre | daz tv dv mir bechant

so rit ich dir ce dineste | in daz eceln lant

1293

di ir mage waren | chvstes an den mvnt

vil minnechliche sheiden | sach man an der stvnt

von rvedgeres | des margraven man

do fvrt div chvneginne | vil manige meit wolgetan

1294

hvndert vnd viere | di trvgen richiv cleit

von gemalet richen pfellel | vil der schilde breit

fvrt man bi den vrowen | nahen vf den wegen

do cherte von ir dannen | vil manich herlicher degen

1295

si zogeten dannen balde | nider dvrch peyerlant

do sagte man div maere | da waeren fvr gerant

vil vnchvnder geste | da noch ein chloster stat

vnt da daz yn mit flvze | in di tvonowe gat

1296

in der stat ce pazzowe | saz ein bisschof

di berge wurden laere | vnt ovch des fvrsten hoff

si ilten gegen den | vff in beyerlant

da der bisschoff pilgrin | di schoenen criemhilden vant

1297

den recken von dem lande | was do niht ce leit

do si ir volgen sahen | so manige schone meit

da trvte man mit ovgen | der edeln ritter chint

gvte herberge | gap man den gesten sint

1298

der bisschoff mit siner nifteln | ce pazzowe reit

do daz den bvrgaeren | von der stat wart geseit

daz dar choeme criemhilt | des fvrsten swester chint

div wart wol enpfangen | von den chovfliuvten sint

1299

daz si beliben solden | der bisschof hetes wan

do sprach der herre ecchewart | ez ist vngetan

wir mvzen varn nider | in rvdgeres lant

vns wartet vil der degene | wan iz ist in allen wol bechant

1300

div maere nv wol wesse | div schone gotelint

si bereite sich mit vlize | vnde ir vil edel chint

ir het enboten rvedger | daz in daz dvehte gvt

daz si der chveneginne | damite troste den mvt

1301

daz si ir rite engenge | mit den sinen man

vf zv der ense | do daz wart getan

do sah man allenthalben | di wege vnmvzech sten

si begonden gegn den gesten | beidiv riten vnd gen

1302

nv was div chvneginne | ce everdingen chomen

genvge vz peyerlande | solden si han genomen

den rovb vf der strazen | nach ir gewonheit

so heten si den gesten | da getan vil lihte leit

1303

daz was wol vnderstanden | von dem margraven her

er fvrte tvsent ritter | vnt dannoch mer

do was ovch chomn gotelint | rvedegeres wip

mit ir chom herliche | vil maniges edeln rechen lip

1304

do si vber di truowen chomen | bi ense vf daz velt

do sah man vfgespannen | hvetten vnt gecelt

da di geste solden | di nahtselde han

div choste was den gesten | da von rvedger getan

1305

gotelint div schone | di herberge lie

hinder ir beliben | vf den wegen gie

mit chlingenden zovmen | manich pfaert wolgetan

der antpfanch wart vil schone | liep was iz rvedger getan

1306

di in ce beden siten | chomen vf den wegen

di riten lobeliche | der was vil manich degen

si pflagen ritterschepfte | daz sach vil manich meit

ovch was der ritter dienest | niht der kvneginne leit

1307

do zv den gesten chomen | di rvedgeres man

vil der trvonzzvne | sach man ze berge gan

von der recken hende | mit ritterlichen siten

da wart wol ce prise | vor den vrowen do geritten

1308

daz liezen si beliben | do grvzte manich man

vil gvtliche einander | do fvrten si von dan

di schonen gotelinden | da si criemhilde sach

di vrowen dienen chvnden | di heten chleinen gemach

1309

der voget von bechelaren | ce sinem wibe reit

der edeln margravinne | was daz niht ce leit

daz er so wol gesvnder | was von rine chomen

ir was ein teil ir swaere | mit grozen vrevden benomen

1310

do sin het enpfangen | er hiez si vf daz gras

erbeizen mit den vrowen | swaz ir da mit ir was

da wart vil vnmvzech | manich edel man

da wart vrowen dienest | mit grozem vlize getan

1311

do sach div vrowe criemhilt | di margravinne sten

mit ir gesinde | si ne lie niht naher gen

daz pferht mit dem zovme | zvchen si began

vnd bat sich snellechlichen | heben von dem satel dan

1312

den bisschoff sach man wisen | siner swester chint

in vnd eckewarten | zv gotelinde sint

da wart vil michel wichen | an der selben stvnt

do chvste div ellende | an der gotelinden mvnt

1313

do sprach vil minnechlichen | daz rvedgeres wip

nv wol mich liebiv vrowe | daz ich iweren schonen lip

han in disen landen | mit minen ovgen gesehen

mir en chvnde an disen ziten | nimmer lieber geschehen

1314

nv lon iv got sprach criemhilt | vil edeliv gotelint

sol ich gesvnt beliben | vnd botelvnges chint

ez mag iv chomn ze liebe | daz ir mich habt gesehen

in beiden was vnchvnde | daz sider mvse geschen

1315

mit zvehten zv zeinander | gie vil manich meit

do waren in di recken | mit dieneste vil bereit

si sazen nach dem grvze | nider vff den chle

si gewunnen maniger chvende | di in vil vremede waren e

1316

man hiez den vrowen schenchen | ez was wol mitter tach

daz edel ingesinde | da niht lenger lach

si riten da si fvnden | manige hvetten breit

da was den edeln gesten | vil michel dienest bereit

1317

di naht si heten ruwe | vnz an den morgen vrv

di von bechelaren | bereiten sich darzv

wi si behalten solden | vil manigen vremden gast

wol het gehandelt rvedeger | daz in da wenich iht gebrast

1318

div venster an den mvren | sah man offen stan

div bvrch ce becehelaren | div was vfgetan

do riten darin di geste | di man vil gerne sach

den hiez der wirt vil edele | schaffen gvten gemach

1319

div rvedgeres thohter | mit ir gesinde gie

da si di chveneginne | vil minnechlich enpfie

da was ovch ir mvter | des margaven wip

mit liebe wart gegrvezet | vil maniger ivnchvrowen lip

1320

si fiengen sich behanden | vnt giengen dan

in einen palas witen | der was vil wolgetan

da div tvonowe | vnder hin vloz

si sahen gegen dem lvfte | vnde heten chvercewile groz

1321

wes si da mere pflaegen | des en chan ich niht gesagen

daz in so vbele zogete | daz horte man do chlagen

di criemhilde recken | wan iz was in leit

hey waz do gvter degene | mit ir von bechelaren reit

1322

vil minnechlichen dienest | rvdger in bot

do gap div chvneginne | zwelf armbovge rot

der gotelinde tohter | vnt also gvt gewant

daz si niht bezzers brahte | in diz lant

1323

swi ir gnomen waere | der nibelvnge golt

alle di si gesahen | di machete si ir holt

noch mit dem chleinem gvte | da si da mohte han

des wirtes ingesinde | dem wart groziv gabe getan

1324

da widerbot do ere | div vrowe gotelint

den gesten von dem rine | so gvetliche sint

daz man der vremden | harte wenich vant

si trvegen ir gesteine | oder ir vil herlich gewant

1325

do si enbizzen waren | vnt daz si solden dan

von der hvsfrowen | wart geboten an

getriwerlicher dienest | daz eceln wip

da wart vil getrivtet | der ivnchvrowen lip

1326

si sprach cer kveneginne | swenne ivch nv dvnchet gvt

ich weiz wol daz iz gerne | min lieber vater tvt

daz er mich zv ziv sendet | in der hivnen lant

daz si ir getriwe waere | vil wol daz criemhilt ervant

1327

div ross bereitet waren | vnt fver bechelaren chomen

do hete div edel chveneginne | vrlovp nv genomen

von rvdgeres wibe | vnd der tohter sin

do schied ovch sich mit grvze | vil manich schonez magedin

1328

einander si vil selten | gesahen nach den tagen

vzzer medeliche | vf handen wart getragen

vil manich goltvaz riche | darinne braht man win

des gesten zv der straze | si mvsen willechomen sin

1329

ein wirt was da gesezzen | astolt was der genant

der wiste si di straze | in daz osterlant

gegen mvtaren | di tvonowe nider

da wart vil wol gedienet | der kveneginne sider

1330

der bisschoff minnechliche | von siner nietel schiet

daz si sich wol gehabte | wi vast er ir daz reit

vnt daz si ir ere chovffte | als helche het getan

hey waz si grozer eren | sit da cen hivnen gewan

1331

zv der treisem brathe | man di geste dan

ir pflagen vlizechliche | di rvedegeres man

vnze daz hivnen | ritten veber lant

do wart der kvneginne | vil michel ere bechant

1332

bi der treisem hete | der chvnich von hivnen lant

eine bvrch vil riche | div was vil wol bechant

geheizen zeyzenmvre | vrov helche saz da e

vnt pflach so grozer tvgende | daz wefrlich nimmer mer erge

1333

ez en taete danne criemhilt | div also chvnde geben

si mohte nach ir leide | daz liep vil wol geleben

daz ir ovch iahen ere | di eceln man

der si sit grozen vollen | bi den helden gewan

1334

div eceln herschaft | was so wit erchant

daz man zallen ziten | in sinem hove vant

di chvnesten recken | von den ie wart vernomen

vnder cristen vnd vnder heiden | di waren mit im alle chomen

1335

bi im was zallen ziten | daz waetlich mer erge

cristenlicher orden | vnt ovch der heiden e

in swi getanem leben | sich ietslicher trvch

daz schvf des chveniges milte | daz man in allen gap genvch