Der Nibelunge Nôt

18. Aventiure

___________________________________________________

Aventivre wie chriemhilt da bestvnt

vnd ir sweher dannen reit

1073

Der sweher criemhilde | gie dar er si vant

er sprach cer chveneginne | wir svln in vnser lant

wir waen vnmaere geste | bi dem rine sin

criemhilt vil liebiv vrowe | nv vart ir zv den landen min

1074

sit daz vns vntriwe | ane hat getan

hi in disen landen | des iwern edeln man

des svlt ir niht engelten | ich vil iv waege sin

dvrch mines svns liebe | des svlt ir ane zwivel sin

1075

ir svlt haben vrowe | allen den gewalt

den iv e taete chvnde | sifrit der degen balt

daz lant vnd ovch div chrone | daz si iv vndertan

iv svln gerne dienen | alle sifrides man

1076

do saget man den chnehten | si solden riten dan

do wart ein michel gahen | nach rossen getan

bi ir starchen vienden was | in ze wesin leit

den vrowen vnt den megden | hiez man svchen div chleit

1077

do der kvnich sigemvnt | wolde sin geriten

do begonde criemhilt | di ir mage biten

daz si bi ir mvter | solde da bestan

do sprach div vrowe herre | daz chvnde niemer ergan

1078

wi mohten ich den immer | mit ovgen angesehen

von dem mir armem wibe | so leide ist geschehen

do sprach der ivnge giselher | vil liebiv swester min

dv solt dvrch dine triwe | hi bi diner mvter sin

1079

di dich da habent beswaerent | vnde betrvebet den mvt

der bedarftv niht ce dienste | nv zer min eines gvt

si sprach zv dem rechen | ia ne mag es niht geschehen

vor leide mvoz ich sterben | swenne ich hagenen mvse sehen

1080

des tvn ich dir ce rate | vil liebiv swester min

dv solt bi dinem brvder | giselhere sin

ia wil ich dich ergezzen | dines mannes tot

do sprach div gotes arme | des waere criemhilde not

1081

do ez ir der ivnge giselher | so gvetlich erbot

do begonde vlegen | vte vnd gernot

vnd ir getriwe mage | si baten si da bestan

si hete lvecel chvennes | vnder sifrides man

1082

si sint iv alle vremde | so sprach gernot

ez en lebet so starcher niemen | er ne mveze ligen tot

daz bedencht liebiv swester | vnd troestet iwern mvt

belibt bi den vrivnden | daz wirt iv waerlichen gvt

1083

si lobte giselhern | si wolde da bestan

div ross gezogen waren | den sigemvndes man

als si wolden riten | cer nibelvnge lant

do was ovch vfgesovmet | al der recken gewant

1084

do gie der herre sigemvnt | zv criemhilde stan

er sprach zv der vrowen | di sifrides man

nv warten bi den rossen | nv svl wir riten hin

wand ich vil vngerne | bi den bvergonden bin

1085

do sprach div vrowe criemhilt | mir ratent di vrivnde min

swaz ich han getriwen | ich svl hie bi in sin

ich habe niemen mage | in nibelvnge lant

vil leit was iz sigemvnde | do erz an criemhilde ervant

1086

do sprach der kvenich sigemvnt | lat iv niemen sagen

vor allen minen magen | svlt ir di chrone tragen

also gewaltechliche | als ir e habt getan

ir en svlt des niht engelten | daz wir den helt verloren han

1087

vnd vart ovch mit vns wider | dvrch iwer chindelin

daz en svlt ir niht vrowe | weise lazen sin

swenne iwer svn gewahset | der trostet iv den mvt

di wile sol iv dienen | manich helt chvne vnd gvt

1088

si sprach herre sigemvnt | ia ne mach ich riten niht

ich mvz hie beliben | swaz halt mit geschit

bi den minen magen | di mir helfen chlagen

do begonden disiv maere | den gvten recken missehagen

1089

si sprachen al geliche | so moehte wir wol iehen

daz vns allererste | waere leit geschehen

woldet ir beliben | bi vnsern vinden hie

so geritten hovereise | noch helde sorchlicher nie

1090

ir svlt ane sorge | got bevolhen varn

man git iv gvt geleite | ich heiz ivch wol bewarn

zv sigemvndes lande | min liebez chindelin

daz sol vf genade | iv rechen wol bevolhen sin

1091

do si wol vernamen | daz si niht wolde dan

do weinten al geliche | di sigemvndes

wi rehte iamerlichen | schiet do sigemvnt

von vrovn criemhilde | do was im vngemvete chvnt

1092

so we der hohgecite | sprach do der kvnech her

ez geschit von chvrcewile | hinfvr nimmer mer

kvnige noch sinen magen | daz vns ist geschehen

man sol nimmer mere | hi cen bvergonden sehen

1093

do sprachen offenliche | di sigemvndes man

ez mohte noch div reise | in diz lant ergan

so wir den reht erfinden | der vns den herren slvch

si habent von sinen magen | starcher viende genvch

1094

er chvste criemhilden | wi iamerlichn er sprach

do si beliben wolde | vnd er daz reht ersach

nv riten vrevden ane | heim in vnser lant

alle mine sorge | sint mir erste nv bechant

1095

si riten an geleite | von wormez an den rin

si mohten wol des mvtes | vil sicherlichen sin

ob si in vientschepfte | wuerden angerant

daz sich weren wolde | der chvnen nibelvnge hant

1096

si ne gerten vrlovbes | da ze cheinem man

do sah man gernot | vnd giselheren gan

zv zim minnechlichen | im was sin schade leit

des brahten in wol inne | di helde chvne vnt gemeit

1097

do sprach gezogenlichen | der fvrste gernot

got weiz daz wol von himele | an sifrides tot

gewan ich nie di schvlde | daz ich daz horte sagen

wer im hie vient waere | ich sol in pilliche chlagen

1098

do gab in gvt geleite | giselher daz chint

er brahte sorgende | vz dem lande sint

den kvenich mit sinen recken | heim ce niderlant

wi lvecel man der mage | darinne vroelichen vant

1099

wi si nu gefveren | des chan ich niht gesagen

man horte hie zallen ziten | criemhilde chlagen

daz ir niemen troste | daz herce vnt ovch den mvt

ez en taete giselher | der was getriwe vnde gvt

1100

prvnhilt div schoene | mit vbermvete saz

swaz geweinte criemhilt | vnmaer was ir daz

si ne wart ir gvter triwe | nimmerme bereit

sit getet ir ovch vrov criemhilt | div vil hercenlichen leit